amérika sérbiyening kosowugha bésip kirish tehditige qarshi bayanat élan qildi

türkiye awazi radiyosi xewiri: bayanatta, kosowu dairilirige qaritilghan hujumgha chétishliq dep qaralghan bir gumandarning nazaretke élinish weqesini sérblarning kosowu dairiliri we yerlik ammigha tehdit sélish, wehime peyda qilish hemde yollarni qanunsiz tosushqa bahane qiliwalghanliqi eskertildi.

bayanatta,«qanunsiz tosuqlarni qurghanlar choqum u tosuqlarni derhal élip tashlishi lazim. zorawanliq we qorqunch sélish bilen qilinghan tehditlerge xatime bérilishini ümid qilimiz. yawropa ittipaqi qanunni bashqurush burchi (EULEX) we shimaliy atlantik ehdi teshkilati-nato kosowu tinchliqni saqlash qisimlirining bixeterlik we erkin sirtqa chiqishni kapaletke ige qilish tirishchanliqlirini memnunluq bilen qarshi alimiz we qollaymiz» déyildi.

bayanatta yene, jiddiy tedbir qollinip weziyetni peseytish we ighwagerchilik heriketliridin saqlinish telep qilindi.

engliyening prishtina we bélgradtiki bash elchixanilirimu birleshme bayanatida, kosowuning shimalidiki yerlik sérblar qurghan tosuqlarni bikar qilishni telep qildi.

barliq qanunsiz tosuqlarning élip tashlinishi we zorawanliqni asas qilghan tehditlerge xatime bérilishini kütüwatqanliqi tekitlengen bayantta yene, yawropa ittipaqining muressechilikidiki kosowu-sérbiye diyalogining ziddiyetni hel qilish we munasiwetlerni normallashturush kélishimi hasil qilishi üchün bir waste ikenliki tekitlendi.

gérmaniye tashqi ishlar ministiri annalina bayérbokmu kosowudiki jiddiylik toghrisida élan qilghan bayanatida, kosowuning shimalidiki töt sheherde muddettin ilgiri saylamlarni kéchiktürüsh qarari bilen jiddiylik peseytilgenlikini, sérbiyening bolsa, kosowugha sérb qisimlirini yollaydighanliqini jakarlap, buning  del eksiche ish qilghanliqi bildürüldi.

ministiri annalina bayérbok sérbiyening bu bayanatlirining qobul qilarliqi yoqluqini shundaqla yawropa ittipaqi qanunni bashqurush burchi (EULEX) ning charlash etritige qilinghan hujumni qetiy qobul qilghili bolmaydighanliqini tekitlidi.

kosowu bash ministiri albin kurti kosowu bixeterlik kéngishi yighinidin kéyin élan qilghan bayanatida, kosowudiki urush axirliship aridin 23 yil ötkendin kéyin, sérbiyening qaytidin urush bashlash bilen we qisimlirini kosowu zéminigha yollash bilen tehdit salghanliqini bildürgen idi.

kosowu bash ministiri albin kurti shimaliy atlantik ehdi teshkilati kosowu tinchliqni saqlash qisimlirining döletning shimalida xelqning erkin sirtqa chiqishini kapaletke ige qilishi üchün chaqiriq élan qilghan idi.