islam hemkarliq teshkilati: xitay – ereb elliri yighinidin xursenmiz
islam hemkarliq teshkilati seudi erebistanning paytexti riyadta chaqirilghan «xitay – ereb elliri bashliqlar yighini» ning netijiliridin xursen ikenlikini bildürdi.
türkiye awazi radiyosi xewiri: islam hemkarliq teshkilatining bildürüshiche, islam hemkarliq teshkilati bash katipi hüseyin ibrahim taha, bashliqlar yighini netijilirining ereb elliri – xitay dostluqining ortaq menpeetlirige xizmet qilidighanliqini, hemde ereb döletliri bilen xitay otturisidiki hemkarliq we ittipaqdashliqni yéngi heriketlendürgüch küchke érishtüridighanliqini éytqan.
bashliqlar yighinining netijiliridin xursen ikenlikini eskertken taha, seudi erebistanning bashliqlar yighinining ötküzülüshi üchün oynighan bashlamchiliq rolini maxtighan.
bayanatta tekitlinishiche, bash katip taha, seudi erebistan tashqi ishlar weziri feysel bin ferhanning teklipige binaen yighingha qatnashqan.
tünügün, seudi erebistanning paytexti riyadta, xitay dölet reisi shi jinpingdin sirt yene, ereb döletliri rehberlirining ishtirak qilishida «xitay – ereb döletliri bashliqlar yighini» ötküzülgenidi.
yighindin kéyin élan qilinghan «riyad bayannamisi» de eskertilishiche, bashliqlar yighinida, xitayning «bir belwagh bir yol» teshebbusini qollash, terepler otturisidiki hemkarliqni kücheytish we kéler qétimliq bashliqlar yighinini xitayning paytexti béyjingda ötküzüsh qarar qilinghan.
buningdin bashqa yene, pelestin mesilisining ottura sherqning asasliq mesilisi ikenliki we bu mesilige ikki döletlik tüzüm endizisige asasen adil we üzül - késil hel qilish charisi tépishning zörürlüki, süriye, liwiye we yemendiki krizislarni hel qilish üchün xelqaraliq we rayonluq sewiyede ortaq heriket qilishning muhimliqi tekitlengen.
