sérbiye: türkiye balqan rayonidiki tinchliqni qoghdighuchi ittipaqdash dölet
sérbiye prézidénti aléksandir wuchich türkiyeni gherbiy balqan rayonidiki tinchliq we muqimliqni qoghdighuchi ittipaqdash dölet dep qaraydighanliqlirini éytti.
türkiye awazi radiyosi xewiri: wuchich, qaradéngiz iqtisadiy hemkarliq parlamént ezaliri mejlisining nöwetchi reislik wezipisi türkiyege ötküzüp bérilidighan 60 - nöwetlik omumiy kéngesh yighinigha qatnishish üchün bélgradqa yétip barghan türkiye büyük millet mejlisi bashliqi mustafa shentopni qobul qildi.
u, shentop bilen élip barghan uchrishishidin kéyin, ammiwi ortaqlishish tor bétidiki sehipiside élan qilghan bayanatida, mundaq dédi: «qimmetlik méhminimiz, türkiye büyük millet mejlisi bashliqi mustafa shentop bilen qayta körüshüsh pursitige érishkenlikim üchün intayin xushalmen. bu pursettin paydilinip, qimmetlik dostlum jumhur reis rejep tayyip erdoghangha qizghin salam yollidim.»
shentop bilen türkiye – sérbiye munasiwetliri, iqtisadiy hemkarliq, énérgiye bixeterliki, dölitidiki türk meblegh salghuchilar we rayonluq mesililer heqqide muzakire élip barghanliqlirini eskertken wuchich, türkiyening balqan rayonida zor rol oynaywatqanliqini tekitlep mundaq dédi: «sérbiye türkiyeni gherbiy balqan rayonidiki tinchliq we muqimliqni qoghdighuchi, peqet sérbiyeningla emes, rayondiki barliq döletlerning puqralirining omumiy bixeterlikige töhpe qoshuwatqan, ul eslihe layiheliirige yardem bériwatqan ittipaqdash dölet dep qaraydu.»
