zélénskiy erdoghan bilen gutérrésqa teshekkür éytti

türkiye awazi radiyosi xewiri: ukraina pirézidénti wolodimir zélénskiy qara déngiz ashliq karidori kélishimining dawamlashturulidighanliqi üstide toxtilip, tünügün (17-noyabir) chiqirilghan qarar sewebidin türkiye jumhur reisi rejep tayyip erdoghan bilen b d t bash katipi antoniyo gutérrésqa teshekkür éytti.

u tünügün kéchide télégram adrésida sinliq uchur hembehirlep, qara déngiz ashliq karidori kélishimining, türkiye, b d t, rusiye we ukraina arisida chiqirilghan qarar bilen uzartilghanliqi toghrisida toxtaldi.

u ashliq yötkesh kélishimi sayisida 1-awghusttin (2022) bashlap ukrainaning odéssadiki portliridin 450 din artuq paraxotta 11 milyon tonnigha yéqin ashliq mehsulatining éksport qilinghanliqini bildürdi.

u: «bu ishni ilgiri sürüsh üchün hemme ishni qilduq, buninggha yardem qilghan barliq shériklirimizge teshekkür éytimen, b d t bash katipi gutérrésqa we türkiye jumhur reisi rejep tayyip erdoghangha ayrim teshekkür éytimen» dédi.

u dunya acharchiliq kirizisining aldini élish üchün ashliq yötkesh kélishimini kéngeytishke munasiwetlik uchrishishlarning ötküzülgenlikini, buninggha amérika, gérmaniye, yaponiye, polsha we bélgiye qatarliq döletlerning qatnishishni telep qilghanliqini eskertti.

u mundaq dédi:

 «dunya ittipaqlashsa acharchiliqni yingeleydu.»

u rusiyening tünügünmu ukrainagha hawa hujumi qilghanliqi sewebidin yette puqraning jénidin ayrilghanliqini we bu sanning éshish mumkinlikini qeyt qildi.

u tünügünki hawa hujumida yene, ukrainadiki éléktr istansisilirining buzghunchiliqqa uchrighanliqini, paytext kiyéw we bashqa rayonlarda 10 milyondin artuq kishining qarangghuda qalghanliqini eskertti.