polshagha bashqurulidighan bomba chüshti

türkiye awazi radiyosi xewiri: polsha pirézidénti andrzéj duda (Andrzej Duda): «bashqurulidighan bombini kimning atqanliqi toghrisida éniq melumat yoq» dégen bolsimu, emma dölet xewpsizlik kéngishini jiddiy toplinishqa buyruq qildi.

polsha bash ministiri matéis morawiki (Mateusz Morawiecki) polshaning nato ezasi ikenlikini xatirilitip, natoning 4-maddisini heriketke ötküzüsh charisining küntertipte ikenlikini éytti.

u rusiye bash elchisining tashqi ishlar ministirliqigha chaqirilghanliqini bildürdi.

biraq, rusiye dölet mudapie ministirliqining yazma bayanatida, mezkur bashqurulidighan bombining rusiyening emesliki tekitlengen halda: «polsha zéminigha rusiyening bashqurulidighan bombisi chüshkenliki toghrisidiki eyibleshler küshkürtchilik bolup, jiddiychilikni téximu ulghaytish meqset qilinghan. rusiye terep polsha-ukraina chégrasidiki nuqtilargha héchqandaq hujum qilmidi» déyildi.

bayanatta, polsha taratquliri tarqatqan przéwodow yézisining bomba chüshken jayidiki xarabiliq körünüshlirining, rusiye qoralliri bilen héchqandaq munasiwitining yoqluqi eskertildi.

amérika pirézidénti jo baydin polsha pirézidénti bilen körüshti we hemkarliqtin bésharet berdi.

aqsarayning bu heqtiki bayanatida, pirézidént baydinning tekshürüsh musapiside polshagha her türlük yardemni qilishqa teyyar ikenliklirini éytqanliqi tekitlinip: «baydin amérikaning natogha qetiy sadiq ikenlikini yene bir qétim tekrarlidi. ikki rehber tekshürüsh dawamlishwatqanda, yéqin alaqini saqlap qélish toghrisida pikir birliki hasil qildi» déyildi.

bu jeryanda, nato polshagha bashqurulidighan bomba chüshkenliki toghrisida: «bu xewerlerni tekshürüwatimiz, ittipaqdishimiz polsha bilen yéqin kordinatsiye halidimiz» dep bayanat élan qildi.

nato bash katipi stolténbérg natoning weziyetni közitiwatqanliqlirini bildürdi.

yawropa ittipaqi kéngishining bashliqi charléz mishél yawropa ittipaqining polshani qollaydighanliqini eskertip, polsha rehberliri, yawropa ittipaqi kéngishiing ezaliri we bashqa ittipaqdashlar bilen zich alaqe qiliwatqanliqlirini qeyt qildi.