baydin: putin ukrainadin esker chékindürmigüche kirizis hel bolmaydu
amérika qoshma ishtatliri pirézidénti jo baydin rusiye pirézidénti wiladimir putin ukrainadin esker chékindürmigüche kirizisning hel bolmaydighanliqini éytti.
türkiye awazi radiyosi xewiri: baydin, shimaliy afriqa we asiya ziyariti üchün aqsaraydin ayrilish harpisida, muxbirlargha bayanat berdi we soallargha jawab berdi.
baydin, xitay dölet reisi shi jinping bilen élip baridighan uchrishishining ünümlük bolidighan-bolmaydighanliqigha dair soalgha, mundaq jawab berdi: «uchrishishlirimning herdaim ünümlük bolghanliqigha ishinimen.»
u, 24 – féwraldin buyan dawamlishiwatqan rusiye – ukraina urushigha xatime bérish charisining qandaq bolidighanliqigha alaqidar bir soalgha, «rusiye pirézidénti wiladimir putin ukrainadin esker chékindürmigüche kirizis hel bolmaydu, dep qaraymen.» dep jawab berdi.
bu ariliqta, amérika qoshma ishtatliri, ukrainani «qisaskar» namliq hawa mudapie sistémisi bilen teminleydu.
amérika qoshma ishtatliri dölet mudapie ministirliqi bayanatchisining yardemchisi sabrina singi, pirézidént baydining yolyoruqigha asasen, amérika armiyesining qoral - yaragh iskilatidin ukrainagha 40 milyon dollarliq herbiy yardem béridighanliqlirini éytti.
u, herbiy yardemning ichide 4 dane «qisaskar» namliq hawa mudapie sistémisining barliqini, bu amérika qoshma ishtatlirining ukrainagha 25 – qétimliq herbiy yardimi hésablinidighanliqini eskertti.
