irandiki weqelerde jénidin ayrilghan namayishchilar sani 253 yetken

türkiye awazi radiyosi xewiri: iran azeri türkliridin hadis nejefining ölümige 40 kün bolghanliqi munasiwiti bilen, kerechtiki sakine qebristanliqida toplanghan namayishchilar «yoqalsun diktator» dep shoar towlidi.

namayishlarning sheher kochilirigha kéngiyishi bilen, saqchilar bilen namayishchilar otturisida sürkilish yüz berdi.

tasnim agéntliqi kerechtiki weqelerde, inqilabiy muhapizetchiler armiyesige qarashliq qoralliq qisimning bir eskirining jénidin ayrilghanliqini, besh saqchining yarilanghanliqini, buning ichide ikki saqchining ehwalining éghir ikenlikini xewer qildi.

ijtimaiy taratqularda tarqalghan widéolarda, namayishchilar aptomobildiki saqchilargha tash étip hujum qilghan, namayishchi ikenliki ilgiri sürülgen bir kishining aptomobil ichidiki yarilanghan saqchigha oq atqan körünüshler bar.

kerechtiki weqelerni kontrol qilish üchün qoshna wilayetlerdin nurghun saqchilarning ewetilgenliki qeyt qilindi.

irandiki azeri türk qizliridin bolghan 22 yashliq hadis nejefi, mahsa eminining ölümidin kéyin, dölet miqyasida bashlanghan namayishlar jeryanida kerech shehiride saqchilarning namayishlarni bésiqturushida alte pay oq tégip jénidin ayrilghan idi.

irandiki namayishlar

paytext téhranda 13-séntebirde (2022)  «exlaq saqchisi» dep bilinidighan irshad xadimliri teripidin tutulghanghandin kéyin ehwali yamanliship doxturxanigha apirilghan 22 yashliq mahsa eminining 16-séntebirde jénidin ayrilishi, iranda naraziliq namayishlirining partlishigha seweb bolghan idi.

iran dairiliri namayishlarda qanche kishining jénidin ayrilghanliqi toghrisida hazirghiche éniq melumat élan qilmidi. merkizi norwégiyege jaylashqan kishilik hoquq idarisi saqchi küchlirining namayishlarni basturushi netijiside jénidin ayrilghan namayishchilar sanining 253 ke yetkenlikini élan qildi.

namayishlarda yüz bergen weqelerde, 30 din artuq saqchi xadimining jénidin ayrilghanliqi qeyt qilinmaqta.