norwégiyede bir rusiye puqrasi uchqu uchurush gumani bilen qolgha élindi

türkiye awazi radiyosi xewiri: norwégiye yerlik taratquliridiki xewerlerde bildürülishiche, tamozhna xadimliri norwégiye bilen rusiye otturisidiki storskog (Storskog)  chégra éghizidiki normal tekshürüshi jeryanida bir rusiyelikning chamadanidin ikki dane uchqu we bir qanche dane éléktronluq qachilash üskünisi tapqan.

11-öktebirde (2022) qolgha élinghan we kimliki ashkarilanmighan mezkur rusiye puqrasining, 24-féwral bashlanghan ukraina-rusiye urushidin kéyin yürgüzülgen émbargolargha xilapliq qilghanliqidin guman qilinmaqta iken.

rusiyege qarshi yürgüzülgen émbargolar boyiche, rusiye shirketliri yaki puqraliri ayropilanlirining «norwégiye zéminigha qonushi, uchushi hemde hawa tewelikidin uchup ötüshi» meni qilinidu.

qolgha élinghan rusiye puqrasining adwokati yéns bérnxard xérstad (Jens Bernhard Herstad) «Dagbladet» gézitining ziyaritini qobul qilip, eyiblengüchining uchqularni uchurghanliqini qobul qilghanliqini, emma norwégiyede néme qilghanliqini éytishni ret qilghanliqini bildürdi.

norwégiye edliye ministiri émili éngér méxl (Emilie Enger Mehl) döletke qarshi istixbarat tehditi barliqidin bésharet bérip: «weqe heqqide xulase chiqirish hazirche baldur» dédi.