G7 dölet guruhi rusiyeni eyiblep, ortaq xitabname élan qildi

türkiye awazi radiyosi xewiri: amérika, engliye, kanada, firansiye, gérmaniye, italiye we yaponiyedin terkip tapqan G7dölet guruhining rehberliri, rusiye ukrainaning nurghun jaylirigha bashqurulidighan bomba atqandin kéyin, jiddiy toplandi.

sinliq shekilde échilghan yighingha, ukraina pirézidénti wolodimir zélénskiymu qatnashti.

rehberler yighindin kéyin élan qilghan ortaq xitabnamede, rusiyening ukrainagha qilghan bashqurulidighan bomba hujumini qattiq eyibleydighanliqlirini bildürdi.

rusiye pirézidénti wladimir putin we bashqa munasiwetlik kishilerni jawabkar dep qaraydighanliqlirini eskertken rehberler, rusiyening ukrainaning qirim we siwastopol rayonliri, shuningdek, donétsk, luxansk, zaporizhya we xérson rayonlirini qanunsiz halda qoshuwalghanliqini qobul qilmaydighanliqlirini, belki eyibleydighanliqlirini tekitlidi.

rehberler rusiyening b d t ehdinamisige ochuq-ashkara xilapliq qilghanliqini eskertip, barliq döletlerni rusiyening xelqara qanunni depsende qilghanliqigha qarshi chiqishqa we armiye-qisimlirini ukrainadin chékindürüshini telep qilishqa chaqirdi.

rusiyeni «iqtisadiy bedel töletküzüsh» ni dawamlashturidighanliqlirini tekitligen rehberler, rusiyening «mesuliyetsizlerche qilghan yadro qoral heqqidiki bayanatliri we qismen seperwerlik élani» qatarliq weziyetni téximu keskinleshtüridighan heriketlirinimu eyibleydighanliqlirini qeyt qildi.

ortaq xitabnamede: «rusiyening ximiyelik, biyologiyelik yaki yadro qorallirini qollanghan ehwalda éghir aqiwetlerni keltürüp chiqiridighanliqini bildürimiz» déyildi.

rusiyening zaporizhya yadro éléktr istansisigha qilinghan hujumimu eyiblengen xitabnamede, yüz bergen her qandaq yaman hadisedin rusiyening jawabkar bolidighanliqi alahide tekitlendi.

rehberler yene, bélarusiyeni rusiye küchlirining zéminini ishlitishige yol qoymasliqqa we ularni qollimasliqqa chaqirdi.

zörür bolghan ehwalda ukrainani dawamliq maliye, insanperwerlik, herbiy we diplomatik yardem bilen teminleydighanliqini jakarlighan rehberler, ukrainaning xelqara étirap qilghan chégrasi ichide musteqilliqi, zémin pütünlüki we igilik hoquqini toluq qollaydighanliqlirini qayta tekitlidi.

xitabnamede, rehberlerning zélénskiygha özlirining ukrainani qishtiki herbiy teyyarliqlarnimu öz ichige halda dawamliq qollaydighanliqlirini yetküzgenliki qeyt qilindi.

xitabnamede mundaq déyildi: «biz kordinatsiye astida, ukrainaning jiddiy éhtiyajliq herbiy we mudapie éhtiyajlirini qamdash yolida tirishchanliq körsitishni dawamlashturimiz.»

shimaliy éqim turuba yollirigha qesten buzghunchiliq qilinghanliqimu tilgha élinghan xitabnamede, muhim ul-eslihelerge qilinghan hujumlar qattiq eyiblendi.