hindonéziyede putbul musabiqisidin kéyin éghir qistangchiliq yüz bérip 129 adem qaza qildi

türkiye awazi radiyosi xewiri: sherqiy jawa ölkisining malang shehiridiki kanjuruxan tenterbiye meydanida pérsébaya surabaya komandisining aréma malang komandisini 2 ge qarshi 3 nomur bilen yéngiwélishidin kéyin, ikki komandining qollighuchiliri otturisida sürkilish yüz berdi؛ saqchilarning jédelni ayrish üchün ishletken yash aqquzush gazidin özini qachurmaqchi bolghan nechche yüz kishi birdinla tenterbiye meydanining derwazisi terepke burulup, éghir qistangchiliq peyda qildi. weqede bughulup qalghanlar, dessilip ketkenler bolup jemiy 129 adem qaza qildi.

sherqiy jawa saqchi idarisi bashliqi niko afinta bayanat élan qilip, kechqurun ötküzülgen musabiqidin kéyin ikki komandining terepdarliri otturisida chiqqan jédelni bésiqturush üchün saqchilarning yash aqquzush gazi ishletkenlikini, yash aqquzush gazining terepdarlar arisida wehime peyda qilghanliqini éytti.

afinta, weqede yarilanghan 300 din artuq kishining rayondiki doxturxanilargha élip bérilghanliqini, emma nurghunlirining yolda we dawalash jeryanida qaza qilghanliqini؛ doxturxanilarda dawaliniwatqan 180 dek yarilanghuchining ichide yarilinish ehwali éghir kishilerning barliqini, shunga qaza qilghanlar sanining köpiyip kétish mumkinchiliki barliqini bildürdi.