rusiyede qismen herbiy seperwerlik élan qilindi

türkiye awazi radiyosi xewiri: rusiye pirézidénti wiladimir putin, rusiye xelqi we ukrainaning sherqidiki atalmish ​​donétsik xelq jumhuriyiti, lugansk xelq jumhuriyiti, xérson we zaporijye rayonlirining ahalilerge qilghan xitabida, qismen herbiy seperwerlik élan qildi.

ukrainaning donbas, zaporijye we xérson rayonlirining musteqilliq qararini qollaydighanliqlirini éytqan putin, gherb döletlirining ukrainada kirizisni tinch yol bilen hel qilish charisini xalimaydighanliqini ilgiri sürüp mundaq dédi: «eger zémin pütünlükimiz tehditke uchrisa, rusiye barliq chare - tedbirlerni qollinidu, bu bir heywe emes.»

u, qsimen herbiy seperwerlik paaliyetlirining bügündin étibaren bashlinidighanliqini, gherb ellirining «igilik hoquqluq, musteqil tereqqiyat merkezlirini basturushqa, rusiyeni yoq qilishqa urunuwatqanliqi» ni eskertip mundaq dédi: «hazir zapas qisimda turuwatqan we ilgiri armiyede xizmet qilghan, bezi herbiy alahidilikliri we tejribiliri bar puqralarla qismen herbiy seperwerlikke chaqirtilidu. herbiy mejburiyet öteshke chaqirilghanlar, qisimgha ewetilishtin burun, alahide herbiy heriket tejribiliri közde tutulup, qoshumche herbiy meshiq siniqidin ötidu.»

bu ariliqta, rusiye pirézidénti wiladimir putin, gherbning ukrainagha rusiye armiyesige qarshi ishlitishke ewetken qoral - yaraghlarni tekshürüsh arqiliq rusiyening qoral - yaraghlirini téz we ünümlük tereqqiy qildurulushni telep qildi.

u, krémil sariyida, rusiye dölet mudapie sanaiti orginining yuqiri derijilik emeldarliri bilen körüshkende, döletning nöwettiki weziyiti, qiyinchiliq we tehditler nezerde tutulghanda, dölet mudapie sanaiti karxanilirining japaliq ishlewatqanliqini bayan qildi.

ukrainadiki rusiye qisimlirini qoral-yaragh, üsküne we oq-dora bilen teminlesh xizmiti ishleydighanliqlirini eskertken putin, ukrainadiki «alahide herbiy heriket» dawamida rusiyening qoral - yaraghlirining ünümining yuqiri bolghanliqini tekitlep mundaq dédi: «kiyéwdiki hazirqi hakimiyetni qollash üchün, shimaliy atlantik ehdi teshkilatining qoral - yaraghlirining hemmisi dégüdek ukrainagha ewetilmekte. bu, bizge qarshi ishlitilgen we u yerde bar bolghan qoral-yaragh iskilatlirini tekshürüshimiz, iqtidarimizni süpetlik östürüshimiz we biz yekünligen tejribe - sawaqlirimizgha asasen üskünilirimiz, qoral – yaraghlirimizni ilgharlashturushimizning zörürlükini körsitidu. bu normal we elwette ishlitishke tégishlik jeryandur. buni imkanqeder téz we ünümlük ishqa ashurush kérek.»

rusiye armiyesi, 24 – féwral küni ukrainagha herbiy heriket qozghighanidi.