yaponiye tashqi ishlar weziri: xitay diplomatiye ministiri bilen körüshüshüm mumkin
yaponiye tashqi ishlar weziri xayashi yoshimasa mushu ayning axirliri (2022-yili séntebir) chaqirilidighan birleshken döletler teshkilati omumiy kéngishi yighinida, xitay tashqi ishlar ministiri wang yi bilen körüshüsh mumkinchilikining barliqini éytti.
türkiye awazi radiyosi xewiri: yaponiye tashqi ishlar weziri xayashi, kündilik muxbirlarni kütüwélish yighinida qilghan sözide, amérika qoshma ishtatliri heyitining aldinqi aydiki teywen ziyaritidin kéyin, xitay tashqi ishlar ministiri wang yining, kütülmigende aldin pilanlanghan ikki tereplik uchrishishlirini bikar qilishi heqqide toxtilip mundaq dédi: «amérika qoshma ishtatlirida 21 – 27 – séntebir künliri chaqirilidighan birleshken döletler teshkilati omumiy kéngishi yighinida, xitay tashqi ishlar ministiri wang yi bilen körüshüshüm mumkin. biz herdaim ikki tereplik uchrishishlarni élip bérish terepdarimiz. derweqe, men türlük sewiyelerdiki diyalogning muhimliqigha ishinimen.»
melumatlargha qarighanda, 2022 – yili séntebir éyi, yaponiye bilen xitayning diplomatik munasiwetlirining normallishishining 50 – yilliqigha toghra kélidiken.
amérika awam palatasi reisi nensi pélosi xanim bashchiliqidiki wekiller ömiki awghustning bashlirida (2022) teywende ziyarette bolghanidi.
pélosi xanim, xitay bilen igilik hoquq ixtilapi ichidiki «teywen arili» ni aridin 25 yil ötkendin kéyin ziyaret qilghan tunji amérika awam palatasi reisi bolghanidi.
«teywen arili» ni térritoriyesining ayrilmas bir parchisi dep qaraydighan xitayning naraziliq qozghighan ziyarettin kéyin, xitay tashqi ishlar ministiri wang yi, kütülmigende yaponiye tashqi ishlar weziri xayashi yoshimasa bilen kambodzhada emelge ashurulidighan pilanliq uchrishishni bikar qilghanidi.
ikki qoshna döletning tashqi ishlar ministirliri, eng axirqi qétim, 2020 – yili noyabir éyida bir yerge jem bolghanidi.
