gutérés: rusiyening yémeklik we oghut mehsulatlirigha cheklime qoyulmasliqi kérek
birleshken döletler teshkilati bash katipi antonyo gutérés rusiyening émbargolargha daxil qilinmighan yémeklik we oghut mehsulatlirining xelqara bazarlargha cheklimisiz sélinishi lazimliqini éytti.
türkiye awazi radiyosi xewiri: gutérés, ukrainaning odéssa portida élan qilghan bayanatida, portning aylarche palech halgha chüshüp qalghanliqini, yer shariwi bir ashliq iskilatidin muhim bir alaqe liniyesining mulazimettin toxtap qalghanliqini, emma istanbulda imzalanghan ashliq kélishimining bu ehwalni özgertkenlikini tekitlep mundaq dédi: «bir aygha yetmigen waqit ichide, ashliq we bashqa yémeklik mehsulatliri qachilanghan 25 paraxot odéssa we ukrainaning bashqa portliridin ayrildi.»
paraxotlarning bughday, kömmiqonaq, aptapperes yéghi we purchaq qatarliq 600 ming tonnidin artuq yémeklik mehsulatlirini toshughanliqini eskertken gutérés, téximu köp paraxotning yolda ikenlikini éytti.
köpligen sahelerde yenila qilishqa tégishlik xizmetlerning barliqini qeyt qilghan gutérés, tawarlarning bahasini töwenlitishte téximu köp rusiye we ukraina mehsulatlirigha érishishning muhimliqini eskertti, hemde rusiyening émbargolargha daxil qilinmighan yémeklik we oghut mehsulatlirining xelqara bazarlargha cheklimisiz sélinishi lazimliqini tekitlep mundaq dédi: «barliq hökümetler we xususiy tarmaqlarning hemkarliship, bu mehsulatlarni bazargha sélishi tolimu muhim. eger 2022-yili oghut bolmisa, 2023-yili yémeklik mehsulatlirimu bolmasliqi mumkin. méning bu nishanlargha yétish iradem qetiydur, emma bu nishanlargha peqet herqaysi tereplerning hemkarliqi bilenla yetkili bolidu.»
