amérika kongresi teywen ziyaritini dawamlashturdi

türkiye awazi radiyosi xewiri: amérika démokrat partiyening massachusts kéngesh palata ezasi éd markéy (EdMarkey) bashchiliqidiki heyet, teywen pirézidénti sey yingwén bilen axbaratqa yépiq shekilde körüshti.

besh kishilik kongre heyiti amérika awam palatasining bashliqi nensi pélosi xanimning xitay bilen yirikchiliklerning ulghiyishigha seweb bolghan teywen ziyaritidin 12 kün kéyin, tünügün kéche (2022-yili 14-awghust) paytext teybéygha yétip bardi.

besh kishilik heyet sey yingwén bilen, amérika-teywen munasiwetliri, rayonning xewpsizlik mesililiri, soda we meblegh sélish, dunya teminlesh zenjirliridiki mesililer we kilimat özgirishi qatarliq témilarni muzakire qildi.

heyet bashliqi éd markéy twittér adrésida uchur hembehirlep: «ziyaretning meqsiti-amérikaning teywenni qollaydighanliqini namayan qilish we teywen boghuzidiki tinchliq hemde muqimliqini ilgiri sürüsh» dédi.

amérika kongresining besh kishilik heyitining bügün (15-awghust) axirlishidighan teywen ziyaritide, tashqi ishlar ministiri joséf wu we parlamént ezaliri bilen körüshidighanliqi bildürüldi.

xitay tashqi ishlar ministirliqining bayanatchisi wang winbin axbarat élan qilish yighinida, amérika kéngesh palata ezasi éd markéy bashchiliqidiki heyetning, xitayning barliq agahlandurushliri we naraziliqlirigha qarimay «xitayning teywen rayoni» ni ziyaret qilghanliqini bildürüp: «bir guruppa amérikaliq siyasetchi teywen musteqilliqini qollaydighan küchler bilen birlikte jinayet ötküzüp, bir xitay siyasitige jeng élan qilishqa urunuwatidu. bular meghlub bolidu» dédi.

u xitayning igilik hoquqini we zémin pütünlükini qoghdash üchün qetiylik bilen bir qatar qararlarni chiqiridighanliqini eskertti.

xitay bir xitay siyasiti arqiliq teywenning dunyadiki döletler bilen diplomatik munasiwetler ornitishigha, b d t da we bashqa xelqaraliq teshkilatlarda wekil turghuzushigha qarshi chiqmaqta, shundaqla özini étirap qilghan döletlerning teywen bilen diplomatik munasiwet ornatmasliqni yaki üzüshini shert qilmaqta.