xitayning teywen xelqini «qayta terbiyelesh» pilani barmu qandaq?

türkiye awazi radiyosi xewiri: xitayning parizhda turushluq bash elchisi lushayé firansiye b f m t w qanilining «BFMTV» mexsus pirogrammisigha qatniship, yéqinqi künlerde teywenge munasiwetlik otturigha chiqqan jiddiychilikler toghrisida toxtaldi.

u xitayning teywenge qarshi herbiy heriket bashlash éhtimalining barliqini bildürüp, uning teywenliklerge qarshi heriket bolmaydighanliqini eskertti.

u teywen xelqining méngisining yuyulghanliqini ilgiri sürüp: «birlishishtin kéyin, ularni qaytidin terbiyeleymiz. u chaghda teywen nopusi birlishishni qollaydighan bolidu, teywenlikler yene wetensöyer bolidu, dep oylaymen» dédi.

u riyasetchining «tehdit sélish arqiliqmu?» dégen soaligha: «tehdit sélish bilen emes, qaytidin terbiyelesh bilen» dep jawab berdi.

u 20 yil ilgiri köpinche teywenlikning teywenning xitayning bir parchisi bolushni qollaydighanliqini tekitlep: «démokratiyeni ilgiri sürüsh partiyesining xitaygha qarshi tetür teshwiqat qilishi sewebidin, bügün araldiki xelq birlishishqa qarshi chiqmaqta» dédi.

u amérika awam palatasi bashliqi nensi pélosi xanimning teywen ziyariti toghrisida toxtalghanda, «nahayiti köp xeterlerni we kirizislarni peyda qilghanliqi» ni bildürdi.

u axirida, jiddiychilikni ulghaytqan terepning xitay emes, pélosi xanimning teywen ziyariti bolghanliqini tekitlep, bu ighwagerchilikke jawab qayturghanliqlirini qeyt qildi.