péskow putin - erdoghan uchrishishi we pélosining teywen ziyariti toghrisida toxtaldi

türkiye awazi radiyosi xewiri: rusiye pirézidéntliq mehkimisi — kirémil bayanatchisi dimitriy péskow, jumhur reis rejep tayyip erdoghan bilen rusiye pirézidénti wiladimir putinning 5-awghust sochida körüshüp, ikki dölet hemkarliqi toghrisida sözlishidighanliqini bildürdi.

u jumhur reis erdoghan bilen pirézidént putinning 5-awghust ötküzülidighan uchrishishi toghrisida toxtilip, ikki rehberning iqtisadtin rayon mesililirigiche bolghan nurghun mesililer heqqide pikir almashturidighanliqini, küntertipning nahayiti zich ikenlikini bildürgen halda: «bu uchrishish öz nöwitide, süriye we ukraina mesilisi, ashliq yötkeshni nazaret qilish üchün qurulghan merkezning paaliyetliri toghrisida özara uchur almashturup turushi we xelqara munasiwetler toghrisida pikir almashturush üchünmu yaxshi purset» dédi.

kirémil bayanatchisi péskow yene, amérika awam palatasi bashliqi nensi pélosining teywen ziyaritining rayondiki jiddiychilikni kücheytiwétidighanliqini bayan qilip: «(pélosining asiya) sayahiti we ishqa ashurulghusi teywen sayahitige  munasiwetlik barliq ishlar pütünley ighwagerchiliktin biaret bolup,  weziyetni jiddiyleshtürüwétidu» dédi.

u, rusiyening bu mesilidiki qarishining xitayningki bilen pütünley oxshash ikenlikige isharet qilip: «elwette, biz xitay bilen yene bir qétim toluq birdek qarashqa igimiz. ularning bu ishqa bolghan intayin sezgür pozitsiyesini chüshinimiz, ular orunluq» dégenlerni qeyt qildi.

péskow, amérikaning bu sezgürlükke hörmet qilishning ornigha zitlishish pozitsiyesi tutqanliqini ilgiri sürüp: «bu yaxshi alamet emes. biz bu yerde peqet qayghumizni ipadiliyeleymiz» dédi.