gutérrés dunya ellirini küchiyip kétiwatqan yadro qoralliri xewpi toghrisida agahlandurdi
birleshken döletler teshkilati (b d t) bash katipi antoniyo gutérrés, dunya miqyasida küchiyiwatqan yadro qorallirining kéngiyish xewpi toghrisida agahlandurdi.
türkiye awazi radiyosi xewiri: b d t omumiy kéngishide ötküzülgen yadro qorallirining kéngiyishining aldini élish shertnamisige tüzitish kirgüzüshni mezmun qilghan 10-qétimliq yighinining échilish nutuqini sözligen antoniyo gutérrés, dunyada künséri küchiyiwatqan yadro qoralliri xewpini tilgha élip, yadro qorallirining kéngiyish xewpi küchiyip ketkechke, sürkilishlerni peseytish küchining ajizlap ketkenlikini, bu ishlarning hemmisining ottura sherq we koréye yérim arilidin tartip rusiyening ukrainagha tajawuz qilishighiche bolghan yadro kirizisliri küchiyip ketken bir peytte yüz bergenlikini otturigha qoydi.
«dunyaning herqaysi jayliridiki siyasiy jughrapiyelik jiddiychilikler yéngi pellige kötürülüp, riqabet hemkarliqlarni boghup qoyghan bolghachqa, diyalogning ornini ishenchsizlik, qoralsizlinishning ornini parchilinish igilimekte» dégen bash katip antonio gutérrés, dunyaning nöwette ilgiriki her qandaq waqitqa qarighanda téximu küchlük shekilde yadro qorallirining kéngiyishining aldini élish shertnamisige mohtaj ikenlikini tekitlidi.
gutérrés ikkinchi dunya urushi (1939-1945) mezgilide yaponiyening xiroshima we nagasaki sheherlirige tashlanghan atom bombilirini eslitip ötkendin kéyin, nöwette dunya miqyasidiki qoral iskilatlirida texminen 13000 yadro qorali barliqini tilgha élip: «insaniyet xiroshima we nagasakining dehshetlik ot apetliridin alghan tejribe - sawaqlarni untup qélish xewpige duch kelmekte» dédi.
u, yadro urushining xetirini azaytip, qoralsizlinish süritini tézlitidighan emeliy chare - tedbirlerning otturigha qoyulushi, yadro téxnikisini peqet tinchliq üchünla ishlitishni teshwiq qilip, bu meqsette köp tereplik kélishimlerning eslige keltürülüshi kéreklikini tekitlidi.
