shiwétsiye türkiyege diplomatiye heyiti ewetishni qarar qildi
shiwétsiye hökümiti, shimaliy atlantik ehdi teshkilati — natogha eza bolush mesilisini muzakire qilish üchün türkiyege diplomatiye ümiki ewetishni qarar qilghanliqini uqturdi.
türkiye awazi radiyosi xewiri: shiwétsiye tashqi ishlar ministiri en lindé, hakimiyet béshidiki sotsiyal démokratlar partiyesining <döletning natogha ezaliq iltimasi sunush toghrisidiki qarari> üstide söhbet élip bérish üchün pat yéqinda paytext enqerege wekiller ömiki ewetilidighanliqini eskertti.
u, rusiyening, shiwitsiyening natogha eza bolush iltimasigha qarita bildürgen inkasigha baha bérip: «rusiye hawa tewelikimizge dexli qildi, bizning natsist ikenlikimiz toghrisida uchur bulghash paaliyiti élip bardi.«tor hujumliri köpiyidu, chégrimizda heriketlinish peyda bolidu» dédi.
sotsiyal démokratlar partiyesi tünügünki yighinida, döletning natogha ezaliq iltimasi sunushi toghrisida qarar maqullighanidi.
yene bir tereptin, natogha eza döletler tashqi ishlar ministirlirining bérlinda chaqirilghan gheriy resmiy yighini jeryanida shiwétsiyelik mensepdishi lindé bilen körüshken ministir mewlüt chawushoghlu, nato yighinigha kirishtin burun bergen bayanatida, shiwétsiye bilen finlandiyening bölgünchi térrorluq teshkilati p k k / y p g ni ochuq – ashkara qollaydighanliqini tekitlep: «barliq agahlandurushimizgha qarimay, közimizning aldida yüz bériwatqan bu ehwal öz nöwitide xelqimizning héssiyatigha passip tesir körsetmekte. shunglashqa, ittipaqdash döletke aylinidighan dölet bizge her küni hujum qiliwatqan, eskerlirimiz we saqchilirimizni shéhit qiliwatqan térrorluq teshkilati p k k / y p g ni qollimasliqi kérek» dégenidi.
