maduro: türkiye herqandaq sharaitta dölitimizni qollidi

türkiye awazi radiyosi xewiri: maduro, tashqi ishlar ministiri mewlüt chawushoghlumu ishtirak qilghan  «3 – nöwetlik wénézuéla – türkiye birleshme hemkarliq komitéti yighini» ning yépilishida qilghan sözide, ikki dölet otturisidiki dostane munasiwetler heqqide toxtilip mundaq dédi: «bu birleshme komitét dairiside, türkiye jumhuriyiti jumhur reisi rejep tayyip erdoghangha alahide salam yollaymen. derweqe, jumhur reis erdoghan hem dölitimizning mislisiz dostidur, hemde bizning semimiy dostimizdur. erdoghan türkiye xelqi bilen birlikte herqandaq sharaitta wénézuélani qollidi we qollap kéliwatidu. biz uning yol körsitishi bilen bir yol achtuq, ortaq menpeetlirimimiz üchün qérindashliq we hemkarliq yolini berpa qilduq.»

u, türkiyening yardemliri toghriliqmu toxtilip mundaq dédi: ««türkiye eng qiyin sharaitlarda her daim wénézuéla xelqini izchil qollidi, tébbiy yardemlerde boldi.»

türkiyening wénézuélagha qarita yürgüzülüwatqan émbargolargha izchil qarshi turup kelgenlikini bayan qilghan maduro, yéqinqi yillardin buyan, ikki dölet otturisida nahayiti küchlük siyasiy we diplomatik ishenchning asaslirini turghuzuwatqanliqlirini qeyt qildi, hemde türkiyelik meblegh salghuchilarni wénézuélagha meblegh sélishqa chaqirdi.

pat yéqinda türkiyede ziyarette bolidighanliqini eskertken maduro, ilgiri «tirilish ertughrul» téléwiziye tiyatirini ishlesh sahesini ziyaret qilghanliqini, bu qétim «qurulush osman» téléwiziye tiyatirini ishlesh sahesini ziyaret qilidighanliqini bildürüp, téléwiziye tiyatiri artislirigha salam yollidi.

u sözini mundaq axirlashturdi:  «biz türkiyeni söyimiz. biz türkiyening heqiqiy dostlirimiz. wénézuéla türkiyening eng yéqin dostidur. yashisun wénézuéla-türkiye munasiwetliri! yashisun tinchliq! yashisun hemkarliq!»