bénnét bilen jo baydin iran inqilabiy muhapizetchiler armiyesi mesilisini muzakire qildi
isirailiye bash mnistiri naftali bénnét amérika pirézidénti jo baydinning iran inqilabiy muhapizetchiler armiyesini térrorluq teshkilati tizimlikidin chiqirilishigha ruxset qilmaydighanliqidin xatirjem ikenlikini bildürdi.
türkiye awazi radiyosi xewiri: isirailiye hökümitining uchur-alaqe ishxanisi bash ministir bénnét bilen amérika pirézidénti jo baydinning téléfonda körüshkenliki toghrisida bayanat élan qildi.
bayanatta, bash ministir bénnétning amérika pirézidénti jo baydingha quddustiki «zorawanliq we küshkürtchilik heriketlirining toxtitilishi üchün qilinghan xizmetler» toghrisida melumat bergenliki qeyt qilindi.
ikki rehberning iran mesilisi üstide özara pikir almashturghanliqi eskertilgen bayanatta, inqilabiy muhapizetchiler armiyesini amérikaning chet el térrorluq teshkilatliri tizimlikidin chiqirish toghrisidiki iranning telipinimu muzakire qilghanliqi bildürüldi.
bayanatta mundaq déyildi:
«men isirailiyening heqiqiy dosti bolghan we isirailiyening xewpsizlikige ehmiyet béridighan pirézidént jo baydinning inqilabiy muhapizetchiler armiyesini térrorluq tizimlikidin chiqirishqa ruxset qilmaydighanliqidin xatirjem. isirailiye bu heqtiki meydanini nahayiti ochuq namayan qildi. iran inqilabiy muhapizetchiliri armiyesi dunyadiki eng chong térrorluq teshkilatidur.»
bayanatta, jo baydinning naftali bénnétning isirailiyeni ziyaret qilish teklipini qobul qilghanliqi we kéyinki aylarda ziyaret qilishni pilan qilghanliqini éytqanliqi qeyt qilindi.
