putin ukrainadiki heriketlirining nishanigha yétidighanliqidin gumanlanmaydighanliqini bildürdi

türkiye awazi radiyosi xewiri: wiladimir putin rusiyede tebriklengen alem achquchiliri bayrimi munasiwiti bilen bélarusiye pirézidénti aléksandir lukashénko bilen birlikte amur rayonidiki wostochniy alem bazisini ziyaret qildi.

ziyariti jeryanida, rusiye bilen ukraina otturisidiki dawamlishiwatqan urush heqqide bayanat bergen putin, rusiye armiyesining donbastiki atalmish ​​bölgünchi hökümetlerge yardem bergenlikini we rusiyening bixeterlikige kapaletlik qilish üchün bezi tedbirlerni yolgha qoyghanliqini éytti.

ukrainadiki toqunushlarning muqerrer ikenlikini ilgiri sürgen putin: «bizning bashqa tallishimiz yoq idi we toghrisimu bu idi. ukrainadiki alahide herbiy heriketning nishanigha yétidighanliqida shübhe yoq. bu chüshinishke bolidighan esliy nishanlardur. meqsitimiz biz étirap qilghan donbas xelqige yardem bérishtin ibaret, mushundaq qilishqa mejbur bolup qalduq» dégenlerni qeyt qildi.

putin ukrainaning gherb teripidin yétekliniwatqanliqini tilgha élip, «kiyéw hökümitining donbas mesilisini tinch yol bilen hel qilishni nishan qilghan minisk kélishimini ijra qilishni ret qilghanliqi»ni bildürdi.

rusiyening dunyadin özini chetke élishni xalimaydighanliqigha isharet qilghan putin sözini dawamlashturup: «biz özimizni yalghuz qoymaymiz. zamaniwi dunyada héchkim, bolupmu rusiyege oxshash chong dölet hergizmu yalghuz qaldurulalmaydu. biz özara munasiwetni dawamlashturushni xalaydighan shériklirimiz bilen hemkarlishishni dawamlashturimiz» dédi.