G7 dölet guruhi rusiyeni agahlandurdi
G7 dölet guruhi ukraina-rusiye urushi 43-künige qedem qoyghan bir waqitta, moskwani her qandaq ximiyelik, biyologiyelik we yadro qorali tehditidin yaki ishlitishidin agahlandurdi.
türkiye awazi radiyosi xewiri: amérika, engliye, kanada, firansiye, italiye we yaponiyedin teshkillengen G7 dölet guruhining tashqi ishlar ministirliri bilen yawropa ittipaqi we nato tashqi ishlar ministirliri yighinidin kéyin, axbarat élan qilish yighini ötküzüldi.
bayanatta, G7 dölet guruhi tashqi ishlar ministirliri bucha shehiride tépilghan puqralarning jesetliri sewebidin rusiyeni eyiblesh bilen birge, jawabkarlardin hésab sorilidighanliqini tekitlidi.
bayanatta: « G7dölet guruhi tashqi ishlar ministirliri we yawropa ittipaqi aliy wekilliki bolush süpitimiz bilen, rusiye armiyesining bucha we ukrainaning bashqa sheherliride qilghan wehshiylikini qattiq eyibleymiz» déyildi.
buchada tépilghan puqralarning jesetlirining jawabkarliridin «hésab sorash we sotqa tartish» wede qilinghan bayanatta, rusiyeni b d t kishilik hoquq kéngishidin chiqiriwétish chaqiriq qilindi.
bayanatta, G7 dölet guruhi tashqi ishlar ministirliri rusiye qobul qilghan xelqaraliq kélishimler ramkisidiki mejburiyetliri xatirilinip, moskwani her qandaq ximiyelik, biyologiyelik we yadro qorali tehditidin yaki ishlitishidin agahlandurdi.
bayanatta mundaq déyildi:
«rusiye bundaq qorallarni her qandaq shekilde ishlitishini qobul qilghili bolmaydu we éghir aqiwetlerge seweb bolidu.»
G7 döletlirining rusiyege bésim qilip, ukraina urushidiki üstünlükini tosush üchün «ilawe cheklesh tedbirliri» arqiliq moskwa üstidiki bésimni kücheytishke tirishiwatqanliqi eskertilgen bayanatta: «émbargolardin qéchish yaki yollar bilen yardem qilish urunushlirini toxtitish üchün birlikte tirishimiz. rusiye énérgiyesige bolghan tayinishchanliqimizni azaytish pilanlirini tézleshtürüsh üchün ilawe qedemlerni basimiz we bu meqsette birlikte tirishchanliq körsitimiz» déyildi.
