zéléniskiy rus armiyesining buchada urush jinayiti sadir qilghanliqini otturigha qoydi
ukraina pirézidénti wiladimir zélénskiy, buchadiki qirghinchiliqning «urush jinayiti» ikenlikini otturigha qoyup, «rusiye armiyesi néme üchün bundaq qildi?» dep soridi.
türkiye awazi radiyosi xewiri: wiladimir zélénskiy rusiye eskerliri chékingen bucha shehirini ziyaret qilghandin kéyin, rominiye parlaméntigha xitab qildi.
buchadiki qirghinchiliqning «urush jinayiti» ikenlikini otturigha qoyghan zélénskiy, aptomobillarning tankilar teripidin éziwétilgenlikini, barliq pakitlar bolmisimu, qiyin-qistaqqa élinghan kishilerning barliqigha isharet qilip: «rusiye armiyesi néme üchün bundaq qildi?» dep soridi.
rusiyening imkanqeder köp kishining ölüshini arzu qilidighanliqini bildürgen zélénskiy: «eger armiye we xelqimiz özini qoghdimighan bolsa idi, ruslar xuddi buchadikige oxshashla ukrainaning hemme yéride qirghinchiliq qilghan bolatti» dédi.
ukrainaning rusiyening birdinbir nishani emeslikini otturigha qoyghan wiladimir zélénskiy, rusiyening odéssagha hujum qilip, u yerdin moldawiyege bir qedem yéqinlashmaqchi ikenlikini éytti we sözini dawamlashturup: «moldawiyening musteqilliqini qoghdash muhim we bu tuna rayonining hemmiside bixeterlikke kapaletlik qilish dégenlik bolidu» dégenlerni qeyt qildi.
zélénskiy ottura yawropa we qara déngiz rayonining teqdirining ukraina zéminida belgilinidighanliqini ilgiri sürdi.
u, rusiye - ukraina urushining 40- künidiki bayanatidimu, ukrainada puqralarning körüge élip qéchilghanliqi, qiyin - qistaqqa élinghanliqi we öltürülgenlikini bayan qilip: «shundaq bir waqit kéliduki, her bir rusiye puqrasi bu urush jinayitini kimlerning sadir qilinghanliqi toghrisidiki pütün heqiqettin xewerdar bolidu» dédi.
dölitidiki qirghinchiliqni kimlerning sadir qilghanliqini békitip chiqip, dunya jamaetchilikige ashkarilaydighanliqlirini tekitligen zélénskiy, qollirida tinch sheherlerni weyran qilghan rus eskerlirige ait nurghun pakitlarning barliqini éytti.
u, dunyaning her qaysi jayliridin kelgen yüzlerche zhurnalistning bucha we ukrainaning azad qilinghan bashqa sheherliride yüz bergen ishlarni körüshi üchün barliq imkaniyetlerni yaritip béridighanliqlirini sözlirige ilawe qildi.
