yawropa ittipaqi – xitay bashliqlar yighini chaqirilidu

türkiye awazi radiyosi xewiri: 23 – nöwetlik yawropa ittipaqi – xitay bashliqlar yighinida, yawropa kéngishining bashliqi charlés michél, yawropa ittipaqi komitétining bashliqi ursula won dér léyén, yawropa ittipaqi tashqi munasiwetler we bixeterlik ishliri siyasiti aliy wekili josép borél, xitay dölet reisi shi jinping we xitay bash ministiri li kéchyang bilen körüshidu.

bashliqlar yighinining asasliq küntertip maddisini, ukrainadiki urushqa xatime bérish üchün hemkarliq yolliri üstide izdinish teshkil qilidu.  yawropa ittipaqining, xitayning eng chong soda shériki bolush süpiti bilen, bixeterlikige biwasite tehdit shekillendürüwatqan urushqa xatime bérish üchün, xitaygha, rusiye bilen bolghan munasiwetliri toghruluq signal bérishi kütülmekte.

yighinda, terepler rusiye – ukraina urushi keltürüp chiqiriwatqan iqtisadiy ziyanlar toghruluq muzakire élip baridu. buningdin bashqa yene, xitay – yawropa ittipaqi munasiwetliride yawropa ittipaqi elliri shirketlirining xitayda, xitay shirketlirining yawropa ittipaqida yaritip bériliwatqan pursetlerdin behrimen bolushi, bu arqiliq sodida küch tengpungluqini saqlap qélish mesilisi toghriliqmu muzakire élip bérilidu.

rehberler yene, ikki terep munasiwetlirining hazirqi ehwali, kilimat özgirishi, janliqlarning köp xilliqi we saghlamliq qatarliq sahelerde hemkarliq ornitish mesiliside muzakire élip baridu.

yawropa ittipaqining, yawropa ittipaqi – xitay kishilik hoquq diyalogining qaytidin bashlitilishi toghruluq chaqiriqta bolushimu kütülmekte.

widéo konférans wasitisi arqiliq chaqirilidighan bashliqlar yighinida, ortaq bayanname qobul qilinmaydu.

aldinqi qétimliq yawropa ittipaqi – xitay bashliqlar yighini, 2020 – yili 22 – iyun küni chaqirilghanidi.

rusiye armiyesi, 24 – féwral küni ukrainagha herbiy heriket qozghighanidi.