israiliye bash ministiri israiliye puqralirini qorallinishqa chaqirdi.
israiliye bash ministiri naftali bénnét yéqinqi künlerde arqimuarqa yüz bergen qanliq hujumlardin kéyin, ijazetnamisi bar israiliye puqralirini «qoral élip yürüsh» chaqirdi.
türkiye awazi radiyosi xewiri: naftali bénnét, aldinqi küni kechte béni barak shehiride 1 saqchini öz ichige alghan 5 israiliyelik qaza qilghan hujumdin kéyin, élan qilghan sinliq uchurida, bir qatar yéngi bixeterlik tedbirlirini qolliniwatqanliqlirini eskertip mundaq dédi: «israiliye puqraliri bolush süpitimiz bilen biz hazir qanliq térrorluq heriketler basquchini bashtin kechürüwatimiz, ilgiriki barliq basquchlardikige oxshash, bu qétimmu choqum biz birlikte ghelibe qilimiz.»
israiliye bash ministiri, yehudiy puqralirigha xitab qilip mundaq dédi: «israiliye puqrasi bolush süpitinglar bilen silerdin qandaq qilishinglar kütülüwwatidu? hoshyar we mesuliyetchan bolushunglar. közünglarni échinglar. kimning qoral élip yürüsh ijazetnamisi bolsa, hazir uni élip yürüshning del waqti yétip keldi. ereb jemiyetliridiki uzun yillardin buyan kishining ishengüsi kelmeydighan derijide toplanghan qanunsiz qorallarni yighishnimu tézlitiwatimiz, hazir buni tazilashning del waqti yétip keldi.»
igilinishiche, israiliyede yéqinqi bir hepte ichide uda 3 qétim qanliq hujum yüz bergen.
