shiwéytsariye ukrainagha yardem qilishi üchün polshani qoral bilen teminlimeydighanliqini uqturdi
shiwéytsariye ukrainani qoral- yaragh bilen teminlishi üchün polshagha oq- dora ewetmeydighanliqini élan qildi.
türkiye awazi radiyosi xewiri: shiwéytsariye fédératsiyesi pirézidénti ignaziyo kassis polsha ziyariti jeryanida dölet téléwiziye istansisi — SRF ning ziyaritini qobul qilip, ukraina - rusiye urushi we rusiyege qaritilghan jazalar heqqidiki qarashlirini otturigha qoydi.
kassis ziyariti jeryanida körüshken polsha bash ministiri matéus morawiykining ukrainagha ewetish üchün polshani oq - dora bilen teminlishini teklip qilghanliqini tilgha élip,: «bu teklip bizning bitereplikimizge mas kelmeydu. men buni morawiykigha éniq eskerttim» dédi.
u, rusiyege qaritilghan jazalar toghrisida toxtilip: «polsha hökümiti bu jazalarni toluq qollashni telep qildi. men bash ministirgha jazalarni qollapla qalmay, téximu köp ishlarni qiliwatqanliqimizni yetküzdüm» dégenlerni qeyt qildi.
uchrishishtin kéyin bash ministir morawiyki bayanat bérip, shiwéytsariye hökümitining tewelikidiki rus kattibashlirining hésabatlirini tonglitip, mal - mülüklirini musadire qilishi kéreklikini otturigha qoydi.
ukraina- rusiye urushidin kéyin, shimaliy atlantik ehdi teshkilati – natogha eza döletler ukrainagha minglarche tankaatar we yüzlerche hawa mudapie bashqurulidighan bombisi, shundaqla zor miqdarda kichik tipliq qoral - yaragh we oq - dora ewetishni qarar qilghanidi.
yawropa ittipaqi döletlirimu 450 milyon yawro qimmitide qoral yardimi bérish we 50 milyon yawro qimmitide qoghdash esliheliri bilen teminlesh üchün heriketke ötkenidi.
biterepliki we xelqara tinchliq söhbetlirige sahibxanliq qilish bilen tonulghan shiwéytsariye, 28- féwral qarar maqullap rusiyege qarita jaza yürgüzüshni qarar qilghan döletler sépige qétilghanidi.
