b d t xewpsizlik kéngishidiki gherb döletliri rusiyeni qattiq eyiblidi
b d t xewpsizlik kéngishidiki gherb döletliri rusiyege xelqara sot mehkimisining urushni axirlashturush qararigha boysunushni chaqiriq qildi.
türkiye awazi radiyosi xewiri: b d t xewpsizlik kéngishi alte döletning telipi bilen rusiyening ukrainagha qilghan hujumlirini muzakire qilish üchün toplandi.
yighinda, gherb döletliri rusiyege xelqara sot mehkimisining urushni axirlashturush qararigha boysunushni chaqiriq qildi.
amérikaning b d t da turushluq daimiy wekili linda tomas grénfild (Linda Thomas Greenfield) rusiyeni xelqara sot mehkimisining qararigha derhal boysunushqa chaqirghanliqlirini eskertip: «rusiye ukrainaning igilik hoquqigha we zémin pütünlükige, shundaqla xelqaraliq qanungha ochuq-ashkara xilapliq qildi» dédi.
engliyening b d t da turushluq daimiy wekili barbara wudward (Barbara Woodward) ukrainada yüz bergenlerge rusiyening jawabkar ikenlikini tekitlidi.
firansiyening wekili nikolas dé riwiyér (Nicolas de Riviere) rusiyege oxshash chaqiriqni qilip, rusiyening b d t xewpsizlik kéngishige sunghan ukraina layihesini qollimaydighanliqlirini, qollighanlarning bolsa, «rusiyege urushni dawamlashturushi üchün ochuq chek bergenliki» ni bildürdi.
norwégye wekili mona jul (Mona Juul) rusiyeni «dunyaning eng chong urush mashinisi» dep eyiblidi we sot mehkimisining qararigha boysunushqa, urushni toxtitishqa chaqirdi.
irélandiye wekili géraldin byirni nason (GeraldineByrneNason) «insanlarning hayatini héchnimige hésablimighan, musteqil, igilik hoquqluq döletning weyran qilinghanliqigha guwah bolghanliqliri» ni eskertip, rusiyedin xelqara sotning qararigha boysunushni telep qildi.
