shimaliy koréye qiteler ara bashqurulidighan bomba sinaq qilghan
amérika dölet mudapie ministirliqi (besh burjeklik bina, péntagon) shimaliy koréyening 26-féwralda (2022) we 4-martta yéngidin yasighan qiteler ara bashqurulidighan bomba sinaq qilghanliqining bayqalghanliqini élan qildi.
türkiye awazi radiyosi xewiri: amérika dölet mudapie ministirliqi shimaliy koréyening 26-féwralda (2022) we 4-martta yéngidin yasighan qiteler ara bashqurulidighan bomba sinaq qilghanliqining bayqalghanliqini, piyongyangning yéqinqi waqitta bu bashqurulidighan bombini dawamliq sinaq qilidighanliqini élan qildi.
amérika dölet mudapie ministirliqi bayanatchisi jon kirbi piyongyang hökümitining 26-féwral we 4-martta qilghan ikki qétimliq bashqurulidighan bomba siniqi üstide toxtilip: «amérika hökümiti analiz qilish arqiliq sinaq qilinghan ikki bashqurulidighan bombining shimaliy koréye teqqiy qilduruwatqan we 2020-yili 10-öktebir shimaliy koréye ishchi partiyesi parat ötküzgende tonushturghan qiteler ara bashqurulidighan bomba (ICBM) ikenlikini éniqlidi» dédi.
u bashqurulidighan bombining nishan qilinghan menzilige yétip baralmighanliqini eskertip: «bu sinaqning meqsiti, toluq menzillik bashqurulidighan bomba qoyup bérishtin ilgiri sistémini közdin kechürüsh idi» dédi.
u amérikaning bu melumatni shimaliy koréyege qarshi jamaet pikri shekillendürüsh üchün ashkarilighanliqidin bésharet berdi.
u mundaq dédi:
«amérika we ittipaqdashlirining bixeterlikini kapaletke ige qilish üchün zörür tedbirlerni yolgha qoyushni dawamlashturimiz.»
amérika hindi tinch okyan qomandanliq merkizi ötkenki künlerde rayonda hawadin charlash paaliyetlirini köpeytish we bashqurulidighan bombidin mudapielinish qabiliyitini östürüsh buyruqi chüshürgen idi.
amérika hindi tinch okyan qomandanliq merkizi mezkur qararni shimaliy koréyening barghanséri éship bériwatqan bashqurulidighan bomba sinaqliri sewebidin chiqirilghanliqini bildürgen idi.
