jonson rusiyening néfiti we tebiiy gazidin qutulushning muhimliqini tekitlidi

türkiye awazi radiyosi xewiri: engliye bash weziri boris jonson kanada bash ministiri jastin trédu we gollandiye bash ministiri mark rutté yawropa döletlirining rusiye néfiti we tebiiy gazigha tayinip qélishtin qutulushining muhim ikenlikini, emma buning qedemmu qedem emelge ashurulushi kérekliki toghrisida agahlandurdi.

engliye bash weziri boris jonson 10-nomurluq ishxanisida kanada bash ministiri jastin trédu we gollandiye bash ministiri rutté bilen 24-féwraldin (2022) buyan dawamlishiwatqan ukraina-rusiye urushigha munasiwetlik körüshüshini emelge ashurghandin kéyin, axbarat élan qilish yighini ötküzdi.

 u yawropaning rusiyening néfiti we tebiiy gazigha tayinip qélishi toghrisida toxtilip: «rusiye hidro karbonlirigha tayinip qélishtin yiraqlishish pütünley toghra bolidighan ish, emma buni qedemmu qedem emelge ashurushimiz kérek» dédi.

u: «rusiyedin bir kéchidila néfit we tebiiy gaz ishlitishni toxtatqili bolmaydu. bu dunyadiki hemme döletning qilalaydighan ishi emes» dédi we her qaysi döletlerning énérgiye mesiliside oxshimaydighan tayinishchanliqlirining barliqidin bésharet berdi.

gollandiye bash ministiri rutté yawropaning rusiye tebiiy gazi we néfitigha tayinip qalghanliqi toghrisida: «échinarliq heqiqet shuki, hazirghiche rusiyening néfiti we tebiiy gazigha tayinimiz. rusiye pirézidénti wladimir putinning kéyinche néme qilidighanliqini peqet texmin qilimiz» dédi.

u rusiye énérgiyesige tayinishtin yiraqlishish qedemmu qedem emelge ashmighan ehwalda ukrainani öz ichige alghan bashqa döletler üchün «éghir aqiwet» lerning bolidighanliqi toghrisida agahlandurdi.

kanada bash ministiri trédu yawropa döletlirining emdi rusiyening «ishenchlik shérik emesliki» ni tonup yetkenlikini we buni teqdirleydighanliqini bildürdi.

trédu her qaysi döletlerning rusiyening néfiti we tebiiy gazigha tayinip qélishtin qutulushining ehmiyitini tekitlep, kanadaning nahayiti az miqdarda rusiyedin néfit import qilghanliqini eskertti.