ukrainadiki ölüm-yétim we bügünki ehwal

türkiye awazi radiyosi xewiri:  ukraina pirézidénti wladimir zélénskiy feysbukta bayanat élan qilip: «deslepki melumatlargha asaslanghanda, 137 qehrimanimizdin, puqramizdin ayrilip qalduq. bular esker we puqra» dédi.

ukraina sehiye minstiri oléx lyashko (Oleh Lyashko) ilgiriki bayanatlirida, rusiyening hujumida 57 kishining jénidin ayrilghanliqini we 169 kishining yarilanghanliqini bildürgen idi.

bu ölümlerning tötining rusiye eskerlirining donétsktiki bir doxturxanini bombardiman qilishi netijiside yüz bergenliki eskertilgen idi.

ukraina pirézidéntliq ishxanisi chérnobil yadro éléktir istansisining kontrolluqini qoldin bérip qoyghanliqini élan qildi.

ukraina pirézidéntliq ishxanisining muawin bashliqi mixayil podolyak (Mihayl Podolyak): «shiddetlik urushtin kéyin, chérnobilning kontrolluqi rusiye eskerlirining qoligha ötüp ketti» dédi.

u yene, buning yawropa üchün eng chong tehditlerdin biri ikenlikini tekitlidi.

u paytext kiyéwdiki xostomél ayrodurumining kontrolluqinimu qoldin bérip qoyghanliqlirini, emma uzun ötmey ukraina qisimlirining ayrodurumni qayturuwalghanliqini qeyt qildi.

diplomatiyelik menbeler ukrainaning port shehiri mariyupolning shiddetlik bombardiman astida ikenlikini we yüzlerche partlashning yüz bergenlikini élan qildi.

ukraina armiyesining qomandani walériy zalujniy (Valeriy Zalujnıy ) birinchi künidiki hujumda, rusiyening 30 din artuq tankasi, texminen 130 herbiy aptomobili, yette ayropilani we alte tik ucharining pachaqlap tashlanghanliqining texmin qiliniwatqanliqini qeyt qildi.

amérika dölet mudapie ministirliqi (péntagon) ning bir yuqiri derijilik emeldari rusiyening tünügün (2022-yili 24-féwral) ukrainagha 160 tin artuq bashqurulidighan bomba atqanliqini we shimaldin ukrainagha kirgen rusiye qisimlirining kiyéwgha yéqinlashqanliqini uqturdi.

rusiye dölet mudapie ministirliqi parashot qisimliri we zerbe bérish qisimlirining qirimdin xérsongha kirgenlikini bildürdi.

bu jeryanda, ukraina istratégiyelik uchur-alaqe merkizi kiyéwni öz ichige alghan nurghun sheherlerde, shu yer waqti 22:00 din 06:00 giche sirtqa chiqishning cheklengenlikini élan qildi. bu waqitlarda ammiwi qatnash wastiliri toxtitildi, emma métro béketliri xelqning panahlinishi üchün ochuq qoyuldi.

bügün (25-féwral) paytext kiyéwde seherde arqa-arqidin partlash awazliri anglandi. kiyéwde bir ayropilanning étip chüshürülgenliki we ayropilanning bir binaning üstige chüshkenliki xewer qilindi.

ukraina dölet mudapie ministirliqi rusiye armiyesining bügün kiyéwgha kirish üchün heriket bashlaydighanliqini perez qilmaqta.

mesul dairiler: «tankalar bilen hujum qilidu, sheherni qoghdashqa teyyarmiz» dédi.

rusiye tünügün (2022-yili 24féwral) ukrainagha hujum qilishni bashlighan idi.