rusiye gherb taratquliridiki xewerlerning yalghanliqini bildürdi

türkiye awazi radiyosi xewiri: rusiye tashqi ishlar ministirliqi bayanatchisi mariya zaxarowa gherb taratqulirini eyiblidi.

u gherb taratqulirining rusiyening ukrainagha hujum qilidighanliqi toghrisida tetür teshwiqat qilghanliqini bildürüp: «nahayiti epsuski, gherb taratquliri üchün urush bashlanmidi. gherb taratquliri urushning yüz bérishi üchün qolidin kelgenni qildi. hujumning yüz béridighanliqigha munasiwetlik héchqandaq ispat yoq. bu heqte gherb taratqulirida biz oqughan hemme xewer yalghan» dédi.

u hem rusiye hemde ukrainaning urush bolmaydighanliqi toghrisida bayanatlarni élan qilghanliqini alahide tekitlep: «gherb döletlirini ukrainagha qoral ewetishtin waz kéchishke chaqirimiz. bu heriketler donbas mesilisining hel qilinishigha we yawropa xewpsizlikige shundaqla muqimliqigha selbiy tesir körsitidu» dédi.

u nato bash katipi stolténbérgning «ruméniyege herbiy qisimlarni orunlashturushni pilan qiliwatqanliqliri» toghrisidiki bayanati üstide toxtilip: «nato uzun waqittin béri qara déngiz rayonini herbiyleshtürüshni pilanlap kelmekte. nato bu tinchliq xaraktérlik hemkarliq rayonini géo politikaliq urush we riqabet meydanigha aylandurush niyitide turmaqta» dédi.

u rusiyening nato döletlirige tehdit sélish we hujum qilish niyitining yoqluqini tekitlep, tinchliqni qollaydighanliqlirini eskertti.

u rusiyening yawropa döletliri bilen énérgiye sahesidiki hemkarliqlar üstidimu toxtilip, amérikaning tebiiy gaz bazirigha hökümran bolushqa urunuwatqanliqini؛ bu sewebtin, ukraina etrapidiki weziyetni muqimsizlashturghanliqini qeyt qildi.

u yene, amérikaning shimaliy éqim tebiiy gaz turuba yoli layihesini tosushqa tirishiwatqanliqini bildürüp, rusiyening yawropagha tebiiy gaz yetküzüshni dawamlashturidighanliqini éytti.