«G-7» dölet guruhi rusiyeni agahlandurdi
dunyada iqtisadi eng tereqqiy qilghan döletlerdin terkip tapqan «G-7» dölet guruhining maliye ministirliri rusiye ukrainani ishghal qilghan ehwalda téz sürette éghir aqiwetlerni peyda qilidighan émbargolarning yolgha qoyulidighanliqini élan qildi.
türkiye awazi radiyosi xewiri: «G-7» dölet guruhining maliye ministirliri ukrainaning nöwettiki weziyiti toghrisida birleshme xitabname élan qildi.
xitabnamede, rusiyening ukraina chégraliri etrapida dawamliq esker toplishining, «éghir endishe» menbesi boluwatqanliqi tekitlendi.
«G-7» dölet guruhining ukraina iqtisadini téz we qetiy tewrenmey qollash üchün heriket qilishqa teyyar ikenliki qeyt qilinghan xitabnamede, G-7 ning jiddiychilikni peseytish üchün dawamlishiwatqan diplomatik tirishchanliqlarnimu qollighanliqi eskertildi.
xitabnamede yene, G-7 ning ukrainaning zémin pütünlüki, igilik hoquqi, iqtisadiy we pul-muamile muqimliqini qoghdash üchün qetiy qarargha ige ikenlikliri, bolupmu xelqara pul fondi teshkilatigha oxshash pul-muamile organliri arqiliq ukrainagha intayin muhim yardemlerning qilinghanliqi bildürüldi.
xitabnamede mundaq déyildi:
«ukrainagha 2014-yildin tartip jemiy 48 milyard dollardin artuq iqtisadiy yardem qilindi. buningdin kéyinmu ukrainaning islahat tirishchanliqlirini asanliqqa ige qilish üchün zörür yardemler qilinidu we ukraina bilen uzun muddet dawamlishidighan maliye asasini berpa qilish üchün özara hemkarliq ornitilidu. jiddiychilikni peseytishke aldin ehmiyet bérimiz. buning bilen birlikte, rusiyening ukrainagha qilghan her qandaq herbiy hujumigha, téz sürette, birla waqitta we küchlük jawabning bérilidighanliqini qayta-qayta tekitleymiz. rusiye iqtisadida éghir aqiwetlerni derhal peyda qilidighan iqtisadiy we maliye émbargolirini öm halda ijra qilishqa teyyarmiz.»
amérika, engliye, firansiye, gérmaniye, italiye, kanada we yaponiye G-7 ge eza. mezkur guruhning hazirqi nöwetchi reislik wezipisini gérmaniye üstige almaqta.
