töt terep rusiyege qayturulidighan jawabni muzakire qildi
yawropa ittipaqi, nato, yawropa xewpsizlik we hemkarliq teshkilati shundaqla amérika mesulliri sérgéy lawrowgha qayturulidighan jawab üstide muzakireleshti.
türkiye awazi radiyosi xewiri: yawropa ittipaqi, nato, yawropa xewpsizlik we hemkarliq teshkilati shundaqla amérika mesullirining, rusiye tashqi ishlar ministiri sérgéy lawrow ewetken mektupqa qayturulidighan jawab toghrisida muzakireleshkenliki bildürüldi.
yawropa ittipaqi tashqi siyasetler we xewpsizlik siyasetliri aliy wekili josép borrélning ishxanisidin élan qilinghan bayanatqa asaslanghanda, töt terepning téléfon söhbiti, borrél, amérika tashqi ishlar ministiri antoni blinkén, nato bash katipi stolténbérg we yawropa iewpsizlik we hemkarliq teshkilatining nöwetchi reis döliti polshagha wakaliten tashqi ishlar ministiri zbigniyéw raw (Zbigniew Rau) otturisida ötküzülgen.
bayanatta körsitilishiche, körüshüshte, «rusiyening ukraina ichide we etrapida esker yighishi, lawrowning 31-yanwar ewetken mektubini öz ichige alghan moskwaning yawropa xewpsizlikini qaytidin tertipke sélish heqqidiki teleplirige munasiwetlik ilgirileshler we diplomatik paaliyetler» muzakire qilinghan.
bayanatta mundaq déyildi:
«borrél, blinkén, stolténbérg we raw qayturulidighan jawablar teyyarlanghanda, yawropa xewpsizlik qurulushining asasiy pirinsiplirini qoghdash éhtiyajini ispatlidi.»
körüshüshte, bu xil muzakirelerde toghra munber süpitide, yawropa xewpsizlik we hemkarliq teshkilatining ehmiyitining tekitlengenliki qeyt qilindi.
rusiye dékabir (2021) éyida, amérika bilen natogha ewetken yawropada xewpsizlik kapaletliri témiliq kélishim teklipide, natoning sherqqe kéngiyishtin waz kéchishni we sherqiy yawropadin herbiy küchlirini chékindürüshini telep qilghan idi.
nato bilen amérikaning ötken hepte qayturghan jawabida bolsa, natoning ishikni ochuq tutush siyasitini dawamlashturidighanliqi, qoral-yaraghlarni kontrol qilish we qoralsizlinishqa oxshash témilarda muzakirelerge teyyar ikenliki qeyt qilinghan idi.
amérika taratqulirida tünügün (2022-yili 1-féwral) élan qilinghan xewerlerde, amérika hökümitining 31-yanwar rusiyedin bir mektup tapshuruwalghanliqi bildürülgen bolup, tashqi ishlar ministirliqi mesullirining mektup mezmuni heqqide toxtalmighanliqi eskertilgen idi.
