amérikaning ukrainagha esker ewetish niyiti yoq

türkiye awazi radiyosi xewiri: aqsaray bayanatchisi jén psaki kündilik axbarat élan qilish yighinida, rusiyening her qandaq bir waqitta ukrainani ishghal qilish tehditi dawamlishiwatqanliqini, emma buning qachan bolidighanliqigha dair héch qandaq texmini yoqluqini tilgha élip, «biz (rusiye pirézidénti wiladimir) putinning kallisidikini bilelmeymiz» dédi.

jén psaki amérikaning her xil éhtimalliqlargha qarita hoshyarliqta ikenlikini tekitlep: «bizning tallighan yolimiz diplomatiyedur, lékin chégra rayonida heriketlinishlerning köpeygenlikini körmektimiz» dédi.

baydinning hazir diqqitini shimaliy atlantik ehdi teshkilatining sherqiy teripige merkezleshtürgenlikini tekitligen psaki: «éniq bolsun üchün dewatimen. baydinning ukrainagha esker ewetish niyiti yoq» dédi

bu ariliqta, jo baydin rusiye ukrainani ishghal qilghan ehwalda, pirézidént wiladimir putingha émbargo yürgüzeleydighanliqini éytti.

jo baydin paytext washingitondiki bir kichik karxanini ziyaret qilish jeryanida muxbirlarning soallirigha jawab berdi.

jo baydin bir muxbirning, «eger putin ukrainani ishghal qilsa, putingha émbargo yürgüzemsiz?» dégen soaligha «hee» dep jawab berdi.

baydin shimaliy atlantik ehdi teshkilatining sherqiy qanitidiki döletlerni qoghdash üchün 8500 amérika eskirining teyyar turghanliqini we bu eskerlerning bir qismining pat yéqinda yawropagha mangidighanliqini bildürüp, «héch bir shimaliy atlantik ehdi teshkilatigha eza döletning qorqushi hajetsiz. biz nato (shimaliy atlantik ehdi teshkilati) bolush süpitiiz bilen ularni qoghdashqa kélimiz» dédi. 

ukrainagha tajawuz qilishning rusiyege éghir iqtisadiy aqiwiti bolidighanliqini tekitligen baydin: «bizning ukrainagha amérika yaki shimaliy atlantik ehdi teshkilati eskerlirini orunlashturush pilanimiz yoq» dédi.

baydin putinnimu tajawuzchiliqning bedilining «bek éghir» bolidighanliqi heqqide agahlandurghanliqini eskertip: «men uninggha eger ukrainagha chégrada toplighan eskerliri bilen kiridighan bolsa, buning ikkinchi dunya urushidin buyanqi eng chong ishghaliyet bolidighanliqini éyttim. bundaq weziyet pütkül dunyani özgertidu» dégen sözlerni ishletti.