baydin: téksastiki weqe térrorluq hujumidur
amérika pirézidénti jo baydin téksastiki chérkawda qoralliq bir kishining töt ademni bir qanche saet görüge éliwalghan weqege «térrorluq hujumi» dep baha berdi.
türkiye awazi radiyosi xewiri: amérika pirézidénti jo baydin filadilfiya shehiride qatnishidighan murasimdin ilgiri söz qilip, töt ademni görüge éliwélish weqesi üstide toxtaldi.
u edliye ministiri mérrik garland (Merrick Garland) bilen téléfonda körüshkenlikini bildürüp: «bu weqe térrorluq herikitidur» dédi.
u görüge élinghandin kéyin qoyup bérilgen kishi bilen téléfonda körüshidighanliqini eskertti.
u jinayetchining qoralni qandaq tapqanliqi heqqidiki soalgha: «hemme soallarning jawabini bilmeymen. hujumchining qoralni kochilariki bir yerdin alghanliqi déyiliwatidu, emma men bilmeymen» dep jawab berdi.
u: «kishilerning kochidin qoral sétiwélishining aldini alalmaymiz» dédi.
téksasning kolléywil (Colleyville) shehiridiki chérkawda tünügün (2022-yili 16-yanwar) qoralliq bir kishi töt ademni görüge éliwalghan idi. görüge élinghanlarning ichidiki birsi aridin yette saet, üchi 11 saettin kéyin qoyup bérilgen idi.
ölük halda qolgha chüshürülgen jinayetchini kimning öltürgenliki toghrisida melumat bérilmidi.
fédératsiye tekshürüsh idarisi (FBI) jinayetchining 44 yashliq engliye puqrasi malik faysal ekrem ikenlikini uqturghan idi.
