nato ukraina mesilisi toghrisida rusiyeni agahlandurdi

türkiye awazi radiyosi xewiri: shimaliy atlantik ehdi teshkilati — nato rusiyening ukrainagha qaritidighan yéngi tajawuzchiliqining bedilining éghir bolidighanliqini, eger rusiye jiddiychilikni peseytse, nato ishenchni ashurush tedbirliri üstide izdinishke teyyar ikenlikini otturigha qoydi.

natoning qarar chiqirish orgini —  shimaliy atlantik kéngishi, «ukraina we uning etrapidiki weziyet» toghrisida bayanat élan qildi.

rusiyening ukraina chégrasidiki herbiy heriketliridin küchlük endishe qiliniwatqanliqigha isharet qilinghan bayanatta: «biz rusiyeni derhal jiddiy weziyetni peskuygha chüshürüp, diplomatik yol tutushqa we herbiy paaliyetlerning ochuq - ashkara bolushigha alaqidar xelqara wedilerge emel qilishqa chaqirimiz» dégen ibarilerge orun bérildi.

«nöwettiki weziyetning ittipaqning bixeterlikige körsitidighan tesirlirini estayidil muhakime qiliwatimiz» déyilgen bayanatta, natoning bixeterlik muhitining buzulushigha keskin jawab qayturidighanliqi tekitlendi.

bayanatta: «ukrainagha téximu ashurup qilinidighan her qandaq tajawuzchiliqning qiyin aqiwetliri we éghir bedelliri bolidu» déyildi.

natoning ukrainaning zémin pütünlüki we igilik hoquqini qollaydighanliqi qayta tekitlengen bayanatta, rusiyening ukrainadiki eskerlirini chékindürüshi telep qilindi.

rusiyening ukrainaning natogha eza bolush mumkinchilikige bolghan naraziliqi tilgha élinghan bayanatta, her bir döletning özining teqdiri we tashqi siyasitini belgilesh hoquqining barliqi, «natoning ukraina bilen bolghan munasiwitining peqet ukraina we 30 ittipaqdash dölet bilen munasiwetlik ehwal» ikenliki tekitlendi.

«rusiye bilen ehmiyetlik söhbet ötküzüshke teyyarmiz» dégen signal bérilgen nato bayanatida, rusiyege sunulghan rusiye – nato kéngishi teshkillesh teklipi tekrarlandi.

bayanatta yene: «eger rusiye jiddiychilikni peseytish üchün konkrét tedbir qollansa, biz ishenchni ashurush tedbirlirini kücheytishke teyyarmiz. yawropa xewpsizlik we hemkarliq teshkilatimu buning bilen munasiwetlik bir supidur» dégen ibarilerge orun bérildi.