birma herbiy hakimyiti yaponyedin yardem telep qildi

türkiye awazi radiyosi xewiri: birma herbiy hakimiyitining yuqiri derijilik bir emeldari yaponiye hökümitining resmiy yardemliri astida, yaponiyelik soda-sanaetchilerning birmadiki soda paaliyetlirini dawamlashturushini telep qildi.

kyodo agéntliqining intérnét tori arqiliq qilghan ziyaritini qobul qilghan birma herbiy hakimiyitidiki sélinma we chet el iqtisadiy munasiwetler ministirliqining ministiri ang nayngo yaponiye bilen bolghan munasiwetler üstide toxtaldi.

u: «yaponiyelik soda-sanaetchilerning birmagha qaytishini chaqiriq qilimen. ishliringlarni dawamlashturunglar, mumkin bolsa, sodanglarning hejimini kéngeytinglar» dédi we tokyo hökümitidin resmiy tereqqiyat yardemlirini dawamlashturushni telep qildi.

u birmada hazirghiche bolghandikidin téximu yaxshi soda muhiti yaratqanliqlirini ilgiri sürüp, dölettiki weziyetning bir qanche ay dawamlashqan qalaymiqanchiliqtin kéyin normallashqanliqini qeyt qildi.

birma armiyesi 2020-yili ötküzülgen saylamda saxtipezlik qilinghanliqining ilgiri sürülüshi we dölette siyasiy jiddiychilik keskinleshkendin kéyin, 1-féwral (2021) hakimiyetni ötküzüwalghan idi.

birma armiyesi döletning emeliyettiki rehbiri we tashqi ishlar ministiri ang san suchini öz ichige alghan nurghun rehber hemde hakimiyet béshidiki partiye mesullirini tutqun qilip, bir yilliq jiddiy halet élan qilghan idi.

birma armiyesining herbiy özgirishke qarshi ötküzülgen namayishlarni we isyanchi guruppilarni qoralliq basturushi netijiside, bügüngiche texminen 1000 kishi jénidin ayrildi, minglarche kishi tutqun qilindi.

birmada bir tereptin, keng kölemlik namayishlar dawamlishiwatqan bolsa, yene bir tereptin, tutqun qilinghan yuqiri derijilik mesullar herbiy sot mehkimiside sotqa tartilmaqta.