yaponiye bilen amérika hindi-tinch okyan rayonida hemkarliqni dawamlashturushni qararlashturdi
yaponiye bilen amérika qoshma ishtatliri erkin we ochuq hindi-tinch okyan rayoni nishanigha yétish üchün ikki tereplik hemkarliqni dawamlashturush toghruluq birdeklik hasil qildi.
türkiye awazi radiyosi xewiri: yaponiye tashqi ishlar weziri toshimitsu motégi, bügün amérika qoshma ishtatliri tashqi ishlar ministiri antoni blinkén bilen 15 minut etrapida téléfonda söhbetleshti.
téléfon söhbitide, ikki rehber, shimaliy koréye asas qilinghan bixeterlik mesilisi, xitayning déngizlardiki herbiy küchining künséri küchiyishi, yer shariwi kilimat özgirishini öz ichige alghan köpligen rayonluq we xelqaraliq mesililer heqqide özara pikir almashturdi, shuning bilen bir waqitta, erkin we ochuq hindi-tinch okyan rayoni nishanigha yétish üchün, ikki tereplik hemkarliqni dawamlashturush toghruluq birdeklik hasil qildi.
yaponiyening yéngi bash weziri fumio kishida, 4-öktebir düshenbe küni resmiy wezipige olturghan we bash wezirlik wezipisini tapshuruwalghandin kéyin, amérika qoshma ishtatliri pirézidénti jo baydin bilen téléfonda körüshüp, tunji qétim diplomatik alaqe qilghanidi. kishidaning motégini yéngi qurulghan hökümettimu tashqi ishlar weziri qilip teyinlishi seweblik, bügünki motégi bilen blinkénning téléfon söhbiti, kishidaning tashqi siyasette muqim pozitsiye tutush yolida izdiniwatqanliqining namayendisi, teriqiside tehlil qilindi.
