aqsaray afghanistanda esker qaldurush tewsiye qilinghanliqini ret qildi

türkiye awazi radiyosi xewiri: amérika armiye bash ishtab bashliqi général mark milléyning tünügün kéngesh palatasi qoralliq qisim komitétida ötküzülgen afghanistandin chékinish musapisi yighinida, amérika prézidénti jo baydinning éytqanlirining eksiche, u we bashqa qomandanlarning hökümetke 2500 eskerni afghanistanda qaldurushni tewsiye qilghanliqini, biraq buning qobul qilinmighanliqini tilgha aldi.  

buninggha qarita aqsaray mexsus bayanat élan qildi.

aqsaray bayanatchisi jén psaki tiwittér hésabida élan qilghan bayanatida, baydinning 19-awghust afghanistandin chékinish jeryanigha dair «ABC» qanili bilen ötküzgen söhbitini ima qilip mundaq dédi:

«baydin «ABC» qanili bilen ötküzgen söhbitide éytqinidek, afghanistandiki urushni axirlashturush bizning dölet menpeetimiz üchün idi. baydén bu heqtiki tewsiyelerning oxshashmighanliqini, emma yuqiri derijilik herbiy meslihetchiler bilen aldinqi nöwetlik hökümet kélishimi sewebidin afghanistanda 2500 esker qaldurushning yirikchilikni kücheytidighanliqi heqqide  pikir birliki hasil qilinghanliqini éytti. dölet mudapie ministiri, armiye bash ishtab bashliqi we amérika merkizi qisimlirining qomandani général (kénnis) makkénzimu buni tekitlidi»  

baydin 19-awghustta «ABC» qanili bilen ötküzgen söhbitide, «yuqiri derijilik herbiy meslihetchiliringiz chékinish waqti toghrisida sizge tewsiyede boldi. sizdin 2500 esker qaldurushni telep qildi. bu toghrimu?» dégen soalgha  jawap bérip, «yaq, bundaq ish yoq, bu mesilide ixtilap bar idi, emma bu toghra emes» dégen sözni ishletken idi.

téléwéziye programmichisi: «sizge eskerlerning u yerde qilishini xalaydighanliqini éytmidimu?» dep qayta sorighanda, baydin, «yaq, ular bizge ne waqitning békitilishide, ne esker qaldurush toghrisida qarshi pikir bildürüp baqmidi» dégen idi.