taliban: «kabul ayrodorumi xelqaraliq uchushlargha teyyar»
afghanistanning kontrolluqini alqinigha kirgüzgen taliban paytext kabuldiki xelqara hamid karzay ayrodorumidiki téxnikiliq mesililerning hel qilinghanliqini we xelqaraliq nöwetchi ayropilanlarning uchushni dawamlashturalaydighanliqini élan qildi.
türkiye awazi radiyosi xewiri: afghanistandiki waqitliq taliban hökümitining tashqi ishlar ministirliqi bayanatchisi abdulqahar balxi élan qilghan yazma bayanatida, xelqara hamid karzay ayrodorumida nöwetchi uchushlar dairiside barliq awiatsiye shirketliri bilen hemkarlishidighanliqini bildürdi.
abdulqahar balxi kabul ayrodorumidiki téxnikiliq mesililerning hel qilinghanliqini tekitlep, ilgiri bu ayrodorumdin qatnaydighan barliq awiatsiye shirketliri we döletlerning afghanistangha uchidighan nöwetchi ayropilanlirini eslige keltürüshini ümid qilidighanliqini tilgha aldi.
abdulqahar balxi afghanistandiki siyasiy özgirish sewebidin awiatsiye saheside bezi qalaymiqanchiliqlar chiqqanliqi tüpeyli awiatsiye tiransportining waqitliq toxtitilghanliqini we emdilikte bolsa, dölet ichi uchushlarningmu bashlinishi mumkinlikini uqturdi.
taliban afghanistanning kontrolluqini alqinigha alghandin kéyin, amérika eskerlirining ayrodorumdin ayrilishtin burun radar sistémisi we bir qisim üskünilerge buzghunchiliq qilghanliqi sewebidin kabul ayrodorumi 8-ayda uchushqa taqalghan idi.
