birma armiyesi ikki nahiyede puqralarni oqqa tutqan
birmada herbiy özgirishke qarshi namayishlarni xewpsizlik qisimlirining qoralliq basturushi netijiside jénidin ayrilghan puqralarning sani 880 ge yetti.
türkiye awazi radiyosi xewiri: birma siyasiy tutqunlargha yardem teshkilatining doklatida, yéqinqi 24 saette üch puqraning jénidin ayrilghanliqi bildürüldi. buning bilen, jemiy jénidin ayrilghanlarning sani 880 ge, qolgha élinghanlar sani 5 ming 104 ke yetken boldi. 1965 kishi üstide qolgha élish qarari chiqirildi.
birmaning sagaying rayonida herbiy özgirishke qarshi guruppilar qurghan xelq mudapie küchi bilen birma armiyesi otturisida 22-iyun (2021) din buyan yüz bériwatqan toqunushlarda, birma armiyesidin eng az dégende 20 eskerning öltürülgenliki ilgiri sürüldi.
xelq mudapie küchining nam-sheripini ashkarilimighan bir ezasi birma «Now» gézitining ziyaritini qobul qilghanda, birma armiyesining rayongha qarashliq ikki nahiyede üch kün boyiche éghir tipliq qorallar bilen puqralarni oqqa tutqanliqini bildürdi.
birma armiyesi bolsa, toqunushlar yaki ölü-yétim toghrisida héchqandaq bayanat élan qilmidi.
b d t birmada armiye bilen herbiy özgirishka qarshi guruppilar otturisidiki toqunushlar sewebidin yurt-makanliridin ayrilghanlar puqralar sanining 230 minggha chiqqanliqini élan qildi.
b d t insanperwerlik kordinatsiye ishxanisi bayanat élan qilip, karen ishtatidila yurt-makanliridin ayrilip taghliq we ormanliq jaylargha qachqanlar sanining 103 mingdin 177 minggha chiqqanliqini qeyt qildi.
bayanatta, 20 ming puqraning hindistan chégrasi tereptiki rayonlargha qachqanliqi eskertildi. 1-féwral (2021) herbiy özgirish yüz bergendin tartip hazirghiche dawamlishiwatqan toqunushlarda, 230 mingdin artuq puqraning yurt-makanliridin ayrilghanliqi we insanperwerlik yardemlerge mohtaj ikenliki bildürüldi.
