amérika: iranning yéngi pirézidénti qilmishlirining jawabkari dep qarilidu

türkiye awazi radiyosi xewiri: aqsaray bayanatchisi jén psaki, kishilik hoquqni depsende qilish qilish jinayiti bilen eyiblinip amérikaning jaza tizimlikige kirgüzülgen, irandiki pirézidéntliq saylimida yéngi pirézidéntliqqa saylanghan ibrahim reisi toghrisida toxtilip: «yéngi pirézidént sadir qilghan kishilik hoquq depsendichilikining jawabkari dep qarilidu» dédi.

psaki aqsarayda ötküzgen kündilik muxbirlarni kütüwélish yighinida, irandiki hakimiyet almishidin kéyin, bu dölet bilen bolghan yadro söhbitining qandaq dawamlishidighanliqi toghrisidiki bir soalgha: «pirézidént jo baydin iran rehbiri eli xameniyni bu söhbetlerdiki qarar chiqarghuchi kishi dep qaraydu. bu ehwal saylamdin ilgirimu shundaq idi, bügünmu shundaq, kelgüsidimu shundaq bolidu» dédi.

psaki, iranning yéngi pirézidénti reisining ötmüshtiki kishilik hoquq depsendichiliki sewebidin amérikaning jaza tizimlikige kirgüzülgenlikidin eslitilishidin kéyin: «yéngi pirézidént sadir qilghan kishilik hoquq depsendichilikining jawabkari dep qarilidu. iran dairilirini küchlük shekilde siyasiy mehbuslarni qoyup bérish, kishilik hoquq we asasiy heq – hoquqlargha hörmet qilishqa chaqirimiz» dégenlerni qeyt qildi.

iran bilen yadro söhbitining dawamlishidighanliqini, emma téxi kélishim hasil qilinmighanliqini tekitligen psaki sözini dawamlashturup: «iran kishilik hoquq yaki rayondiki munasiwiti nuqtisidin dunyawi küch emes. biz dölet menpeetimizni közlep yadro kélishimi tüzüshning koyida boluwatimiz. emma biz bu nuqtidin atlap ketmeymiz» dédi..

yene bir tereptin, pisaki baydinning 25- iyun jüme küni afghanistan pirézidénti eshref gheni bilen ötküzidighan uchrishishigha «intayin ehmiyet béridighanliqi»ni otturigha qoydi.

u, baydin bilen ghenining mezkur uchrishishta, ortaq xizmet saheliri we kishilik hoquq yardimi mesilisi toghrisida söhbetlishidighanliqini éytti.