yawropa ittipaqi bélarusiyeni ayrodurum we hawa teweliklirige kirgüzmeslikni qarar qildi

türkiye awazi radiyosi xewiri: yawropa ittipaqi bélarusiye hökümitining bir yoluchilar ayropilanini «mejburiy» qondurup, bir öktichi zhurnalistni nazaret astigha élishini eyiblidi hemde bu döletni yawropa ittipaqi hawa boshluqi we ayrodurumliridin paydilandurmasliqni qarar qildi.

bélgiyening paytexti biryusséldiki yawropa ittipaqi bashliqlar yighini dawamlishiwatqan esnada, yawropa ittipaqining alaqidar emeldarliri, bashliqlar birdeklik hasil qilghan yighin xitabnamisining bélarusiyege alaqidar qismini jamaetchilik bilen ortaqlashti.

qarargha asaslanghanda, bashliqlardin terkib tapqan yawropa ittipaqi kéngishi, aténa (aféna) – wilnyus arisida qatnawatqan yoluchilar ayropilanining aldinqi küni bomba melum qilish usulidin paydilinip bélarusiyening paytexti minsikigha «mejburiy qondurulushi»ni eyibligen.

kéngesh, ayropilandin chüshürülüp nazaret astigha élinghan öktichi zhurnalist raman prataséwich we uning qiz dostining derhal qoyup bérilishini telep qildi.

yawropa ittipaqi rehberliri bu weqege «misli körülmigen, shundaqla qobul qilghili bolmaydighan ish» dep baha bérip, xelqara puqralar awiyatsiye teshkilatini bu mesile üstide derhal tekshürüsh élip bérishni bashlashqa chaqirdi.

rehberlerning bayanatida, bélarusiye emeldarliri we her qaysi sahelerge yéngi jazalarning yürgüzülüshi, hemde yawropa ittipaqi awiyatsiye shirketlirining bélarusiye hawa tewelikidin ötmesliki telep qilindi.

bayanatta yene, bélarusiye awiyatsiye shirketlirining yawropa ittipaqi hawa tewelikidin ötüshini cheklesh we ayropilanlirining yawropa ittipaqi ayrodurumlirigha qonushining aldini élish telep qilindi.