birma herbiy hakimiyiti arakan musulmanlirining yurtlirigha qaytishi toghrisida éniq jawab bermidi

türkiye awazi radiyosi xewiri: birmada 2021-yili 1-féwral herbiy özgirish bilen hakimiyetni tartiwalghan armiye ishtab bashliqi min ang xlaying étnik qirghinchiliq netijiside yurt-makanliridin ayrilghan arakanliq musulmanlarning yurtlirigha qaytalaydighan yaki qaytalmaydighanliqigha, birma qanunliri ramkisida qarar bérilidighanliqini bildürdi.

u xongkong sumrugh (Phoenix) téléwiziyesining ziyaritini qobul qilghanda, 2017-yili birma armiyesining étnik qirghinchiliqi netijiside yurt-makanliridin ayrilghan we köpinchisi bangladéshta panahlanghan arakan musulmanlirining birmagha qaytip-qaytalmaydighanliqi toghrisidiki soalgha: «birmaning qanunlirigha uyghun bolmisa néme qilalaymiz? dunyada héchqandaq döletning musapir qobul qilish üchün özining musapirlar qanunlirigha xilapliq qilidighanliqigha ishenmeymen» dep jawab berdi.

u yene, «xelqaraning arakanliqlarning qaytishi üchün qilghan chaqiriqi netijisiz qaldimu?» dégen soalgha, béshini lingishtip: «hee» dep jawab berdi.

herbiy özgirishke qarshi ötküzülüwatqan namayishlarni birma xewpsizlik tarmaqlirining qoralliq basturushi netijiside, jénidin ayrilghanlarning sani 824 ke chiqti. 4 ming 301 kishi tutqun qilindi, 1841 kishi üstide tutush qarari chiqirildi.

b d t alahide wekili kristin shiriynér burgénér (Christine Schraner Burgener) birma xelqining herbiy özgirish qilghan armiyege qarshi qorallanghanliqini we ichki urush partlash mumkinliki toghrisida agahlandurdi.

burgénér birmada yémek-ichmek xetirining ashqanliqini eskertip: «kélerki üch yaki alte ay ichide 3.4 milyon kishi siyasiy kirizis seweb bolghan iqtisadiy turghunluq sewebidin yémek-ichmek xetirige duch kélishi mumkin» dédi.

u herbiy özgirishtin buyan 61 mingdin artuq kishining yurt-makanliridin ayrilghanliqini bildürüp, 12 ming kishining qoshna döletlerge qachqanliqini qeyt qildi.