israiliyening hujumlirida shéhit bolghanlarning sani köpeydi
israiliyening pelestinliklerge qaratqan hujumlirida shéhit bolghanlarning sani 139 gha yetti.
türkiye awazi radiyosi xewiri: israiliye urush ayropilanlirining, ghezze rayonining gherbiy qismigha jaylashqan «shati <musapirlar lagéri>» da bir öyni bombardiman qilishi netijiside köpinchisi bala bolup, yene 10 pelestinlik shéhit boldi.
shuning bilen, 10 – maydin buyan shéhit bolghan pelestinliklerning sani 139 gha, yarilanghanlarning sani 950 ke yetti.
israiliye urush ayropilanliri, tünügün kéchimu ghezze rayonining shimaliy qismini texminen 30 qétim bombardiman qildi.
maarip idarisining etrapi, puqralarning öyliri we bir jame nishan qilinghan bombardiman netijiside, rayonning köp qismida tok üzülüp qaldi.
yene bir tereptin, hamas siyasiy biyurosining muawin mesuli salih el aruri, ghezzede quruqluqtin bashlitilidighan herbiy heriketning, israiliye üchün palaket bolidighanliqini we urush tengpungluqini özgertidighanliqini éytti.
israiliyening ghezzege quruqluqtin hujum qozghighanliqi toghruluq axbarat wasitilirida chiqqan xewerler heqqide hamasqa ait «eleqsa <téléwiziye qanili>» da bayanat élan qilghan aruri, tirkishish küchlirining, düshmen (israiliye) ni heyran qalduridighan küchke ige ikenlikini we qolida ilgiri ishlitilgen qoral – yaraghlardinmu ilgharlirining barliqini qeyt qildi.
