blinkén abbas bilen téléfonlashti

türkiye awazi radiyosi xewiri: amérika tashqi ishlar ministiri antoni blinkén, rayonda dawamlishiwatqan jiddiychilikning peskuygha chüshüshi we zorawanliq weqelirining axirlishishi kéreklikini éytti.

amérika tashqi ishlar ministirliqi bayanatchisi néd prays, antoni blinkén bilen mehmud abbasning téléfonliship, rayondiki eng yéngi özgirishler heqqide sözleshkenlikini bildürdi.

bayanatta, «ministir blinkén bilen pirézidént abbas quddus, gherbiy qirghaq we ghezzediki zorawanliqlar toghrisida sözleshti. ministir rayondiki weqelerde hayatidin ayrilghanlar üchün teziye bildürdi» dégen ibarilerge orun bérildi.

israiliyening balilarni öz ichige alghan nurghun puqraning ölümini keltürüp chiqarghan hujumliri toghrisida biwasite toxtalmighan blinkén, abbas bilen ötküzgen téléfon söhbitide, israiliyege qilinghan rakéta hujumlirini eyiblidi, jiddiychilik peskuygha chüshüshi we zorawanliqning axirlishishi kéreklikini eskertti.

«ministir blinkén yene pelestinlikler bilen israiliyeliklerning barawer derijide erkinlik, ghurur, bixeterlik we bayashatliq ichide yashashqa layiq ikenlikige ishinidighanliqini otturigha qoydi» déyilgen bayanatta, blinkénning mehmud abbasning roza héytini tebrikligenliki toghrisidiki uchurlarghimu orun bérildi.