amérika bilen xitay kélimat özgirishige qarshi birleshme bayanat imzalashti
amérikaning kélimat özgirishige qarshi küresh alahide wekili jon kérri shangxeyde ikki kün dawamlashqan uchrishishtin kéyin xitay bilen birleshme bayanat imzalidi.
türkiye awazi radiyosi xewiri: amérika bilen xitay hökümetliri kélimat özgirishige qarshi téximu ünümlük küreshke éhtiyaj barliqini tekitleydighan birleshme bayanat imzalashti.
amérika bilen xitayning kélimat özgirishige qarshi küresh alahide wekilliri jon kérri we shé jénxua xitayning shangxey shehiride ikki kün dawamlashqan uchrishishtin kéyin hökümetlirige wakaliten birleshme bayanat élan qildi.
jon kérri bilen shé jénxua uchrishishtin kéyin élan qilghan birleshme bayanatida, amérika bilen xitayning kélimat özgirishige qarshi küreshte téximu aktip hemkarlishishi kéreklikini tekitleshti.
bayanatta, parizh kélimat kélishimining maddilirining ijra qilinishining kélimat özgirishige qarshi küreshte waz kéchishke bolmaydighan mesile ikenliki we her ikki döletning bu heqte sezgür muamile qilidighanliqi otturigha qoyuldi.
bayanatta yene 22-we 23-aprél künliri ötküzülidighan kélimat özgirishi rehberler yighini we noyabirda ötküzülidighan kélimat özgirishi konféransiningmu muhimliqi bildürüldi we her ikki döletning yer shari karbonni azaytishta tégishlik jawabkarliqlirini orundishi kérekliki tekitlendi.
amérikaning sabiq pirézidénti donald tramp amérikani parizh kélimat kélishimidin chékindürüp chiqqan idi. emma 20-yanwar wezipige olturghan jo baydin hökümiti bolsa, amérikani kélishimge qaytidin qatnashturghan idi.
