amérika 11 - séntebirgiche afghanistandin esker chékindüridighanliqini bildürdi

türkiye awazi radiyosi xewiri: amérika tashqi ishlar ministiri antoni blinkén, 11- séntebirgiche amérikaning afghanistandin esker chékindüridighanliqini bildürdi we bu mesilini bügün shimaliy atlantik okyan ehdi teshkilati – natodiki ittipaqdashliri bilen muzakire qilidighanliqini éytti.

antoni blinkén bélgyening paytexti biryusséldiki nato bash ishtabida nato bash katipi yéns stolténbérg bilen ötküzidighan uchrishishidin burun bayanat bérip, amérika we uning bir qisim ittipaqdashlirining buningdin 20 yil ilgiri yüz bergen 11- séntebir térorluq hujumidin kéyin afghanistangha barghanliqini eslitip ötti.

«biz afghanistandiki nishanimizgha yettuq, hazir eskerlirimizni qayturup kélish peyti keldi» dégen blinkén, amérika pirézidénti jo baydinning bir nechche saettin kéyin chékinish toghrisida bayanat élan qilidighanliqini, öziningmu natodiki ittipaqdashliri bilen bu mesilini muzakire qilidighanliqini bildürdi.

blinkén, afghanistangha birlikte bérish we birlikte qaytish pirinsipini bashtila békitkenliklirige isharet qilip: «kelgüsi bir nechche hepte we nechche ay ichide (shimaliy atlantik ehdi teshkilatidiki ittipaqdashlirimiz bilen) afghanistandin eskerlirimizni bixeter we mas qedemde chékindürüsh mesiliside yéqindin hemkarlishimiz» dégenlerni qeyt qildi.

u, rusiyening ukraina we uning etrapigha esker orunlashturushigha munasiwetlik mesililerningmu bügünki nato yighinida muzakire qilinidighanliqini éytti.

nato bash katipi yéns stolténbérg, rusiyening esker orunlashturushidin ensirewatqanliqini, krémil sariyining bu ishni uni tézdin toxtitip, ighwagerchilikni tügitip, jiddiylikni peseytishi kéreklikini éytti.