amérika tashqi ishlar ministiri xitaygha tehdit saldi

türkiye awazi radiyosi xewiri: amérika qoshma ishtatliri tashqi ishlar ministirliqi bayanatchisi néd praysning, tashqi ishlar ministiri antoni blinkénning xitay kompartiyesi merkiziy komitéti tashqi ishlar ishxanisining mudiri yang jyéchi bilen téléfonda körüshkenliki heqqide élan qilghan yazma bayanatida eskertishiche, téléfon söhbitide, blinkén, amérika qoshma ishtatlirining xelqaraliq tüzüm ichide ittipaqdashliri bilen birlikte hemkarliq asasida heriket qilidighanliqini tekitlesh bilen bir waqitta, «hindi-tinch okyan rayonining bixeterlikige tehdit salidighan teshebbusliri» we «xelqaraliq tüzümge buzghunchiliq qilidighan heriketliri» seweblik xitayni jawabkarliqqa tartidighanliqlirini qeyt qilghan. shuning bilen bir waqitta, amérika qoshma ishtatlirining uyghur aptonom rayoni, tibet we xongkong qatarliq jaylarda kishilik hoquq we démokratik qimmet ölchemlirini qoghdashni dawamlashturidighanliqini, birmidiki herbiy – siyasiy özgirishni eyiblesh mesiliside xitaygha bésim ishlitidighanliqini tekitligen.

amérika qoshma ishtatliri pirézidénti jo baydin, peyshenbe küni, tashqi ishlar ministirliqida diplomatiye siyasiti heqqide sözligen nutiqida, xitayni «eng muhim yer shari xaraktérlik reqibimiz» dep atighanidi.

blinkén, xitayning uyghur aptonom rayonida uyghurlargha qarshi «irqiy qirghinchiliq» yürgüzüwatqanliqini  otturigha qoyghanidi.

u yene, gérmaniye tashqi ishlar ministiri héyko maas, firansiye tashqi ishlar ministiri yén ywés lé drian we engliye tashqi ishlar weziri dominik raab bilenmu  téléwiziye - téléfon yighini arqiliq körüshkenidi.

amérika qoshma ishtatliri tashqi ishlar ministirliqi bayanatchisi néd prays, yazma bayanida, blinkénning  téléwiziye - téléfon yighinida, «kowid – 19» yuqumi, iran, rusiye, xitay, birma, kilimat özgirishi we bashqa jiddiy mesililer heqqide muzakire élip bérilghanliqini uqturdi.

blinkénning, seudi erebistan tashqi ishlar weziri feysel bin ferhan essuud bilen téléfonda körüshkenliki bildürüldi.

seudi erebistan tashqi ishlar ministirliqi teripidin élan qilinghan yazma bayanatta eskertilishiche, téléfon söhbitide, essuud, blinkénning tashqi ishlar ministiri bolghanliqini tebrikligen, seudi erebistanning rayonda bixeterlik we muqimliqning ishqa ashurulushi üchün amérika qoshma ishtatliri hökümiti bilen hemkarlishishni arzu qilidighanliqini qeyt qilghan.

bu téléfon söhbiti, blinkénning amérika qoshma ishtatliri tashqi ishlar ministiri bolghandin kéyinki seudi erebistan bilen ornatqan tunji alaqisi hésablinidu.