amérikaliq bir emeldar fahrizade suyiqestining arqisida israiliyening barliqini ilgiri sürdi
amérikaliq yuqiri derijilik bir emeldar, iranning aldinqi qatardiki yadro qorali tetqiqatchisi muhsin fahrizade suyiqestini israiliyening qilghanliqini ilgiri sürdi.
türkiye awazi radiyosi xewiri: amérikaliq bir emeldar ismining ashkarilanmasliqini shert qilghan halda CNN téléwiziyesining ziyaritini qobul qilip, israiliyening iranliq alim muhsin fahrizadege suyiqest qilghanliqini bildürdi.
israiliyening barliq heriketlirini amérikagha aldin doklat qilidighanliqigha isharet qilghan mezkur emeldar, mezkur hujum toghrisida amérikagha aldin melumat bérip – bermigenlikini ashkarilimidi.
u, iran suyiqest mesliside israiliyeni eyibligenliki üchün, rayondiki amérika puqralirigha héchqandaq xewp yetmeydighanliqi qarishini otturigha qoydi.
mezkur emeldar, iranning hazirghiche quddus qisimliri qomandani qasim sulaymanining intiqamini almighanliqini qeyt qilip, sulaymani wapat bolghanliqining bir yilliqini xatirilesh munasiwiti bilen iranning bir yerge hujum qilishidin endishe qilidighanliqini sözlirige ilawe qildi.
u yene, amérikaning sulaymani öltürülgen 3 – yanwar künide birer yerge hujum qilinidighanliqini kütüwatqanliqini, biraq saylamda ghelibe qilghan jo baydinning qesem bérip wezipe ötküzüwélish murasimigha peqet ikki heptila waqit qalidighan bolghachqa, téhranning tallash yollirining cheklik bolidighanliqini ilgiri sürdi.
u axirida, iranning amérika eskerliri yaki puqralirigha hujum qilishining, jo baydinning iran yadro kélishimige qaytidighanliqi toghrisidiki wedisini qiyin ehwalgha chüshürüp qoyidighanliqi tekitlep ötti.